„ნაციონალური მოძრაობის“ წევრების განცხადებით, ბათუმის საკრებულოში ლაშა კილაბერიას ადგილმონაცვლეების სიიდან ნიკა მელიას მხარდამჭერები ამოიღეს
„ერთიანი ნაციონალური მოძრაობის“ წევრების განცხადებით, ბათუმის საკრებულოში ლაშა კილაბერიას ადგილმონაცვლეების სიიდან ნიკა მელიას მხარდამჭერები: ლევან გორგილაძე, როინ დვალი, ელიზა ეფაძე და შორენა აბაშიძე ამოიღეს. როგორც მათ პარტიის ოფისში გამართულ ბრიფინგზე განაცხადეს, გადაწყვეტილება ლევან ხაბეიშვილმა მიიღო.
„ერთიანი ნაციონალური მოძრაობის“ ბათუმის ორგანიზაციის წევრები პარტიის ლიდერის ლევან ხაბეიშვილის თანამდებობიდან გადაყენებას ითხოვენ.
„ერთიანი ნაციონალური მოძრაობის” წევრების თქმით, პროცედურის მიხედვით სიაში ლაშა კილაბერიას ჩანაცვლება უნდა მომხდარიყო, თუმცა ლევან ხაბეიშვილმა გადაწყვეტილება თვითნებურად მიიღო და სიიდან ნიკა მელიას მხარდამჭერები ამოიღო.
„ნაცვლად იმისა, რომ ლევან ხაბეიშვილი დაკავებული იყოს წინასაარჩევნო დაპირებებით, მას ჰქონდეს უწყვეტი საპროტესტო აქციები მიხეილ სააკაშვილის გასათავისუფლებლად, ის მუშაობდეს ნიკა გვარამიას გათავისუფლებაზე, პასუხობდეს სხვადასხვა გამოწვევებს ჩვენ ქვეყანაში, ლევან ხაბეიშვილი ცვლის ბათუმელების ნებას“, - განაცხადა გიორგი კირთაძემ.
