„ნაციონალური მოძრაობიდან“ აჭარის უმაღლესი საბჭოს წევრის განცხადებით, ბათუმის საკრებულოში ლაშა კილაბერიას ადგილმონაცვლეების სიიდან თანაგუნდელები იმ მიზეზით ამოიღეს, რომ ისინი პარტიის ინტერესებს არ ატარებდნენ
ბათუმში „ერთიანი ნაციონალური მოძრაობის” ერთი ნაწილის ბრალდებას თანაგუნდელები გამოეხმაურნენ.
როგორც აჭარის უმაღლესი საბჭოს წევრი ლევან ანთაძე აცხადებს, ბათუმის საკრებულოში ლაშა კილაბერიას ადგილმონაცვლეების სიიდან თანაგუნდელები იმ მიზეზით ამოიღეს, რომ ისინი „ერთიანი ნაციონალური მოძრაობის” ინტერესებს არ ატარებდნენ.
„პარტიის თავმჯდომარეს აქვს უფლება ამოიღოს სიიდან ის ადამიანები, რომელსაც საჭიროდ ჩათვლის. რატომ მოხდა ამ ადამიანების ამოღება? ეს ადამიანები ბოლო თვეების განმავლობაში საერთოდ არ კონტაქტობდნენ პარტიასთან, მიუხედავად არაერთი მოწვევისა. ისინი არ თანამშრომლობენ პარტიასთან, არ გამოხატავენ პარტიის ინტერესებს და თავისთავად, გასაგებია, ჩვენი ბათუმის ორგანიზაციის მოთხოვნა იყო, რომ ეს ადამიანები ამოღებული ყოფილიყვნენ პარტიული სიიდან და შესულიყვნენ ის ადამიანები, რომლებიც პარტიულ ინტერესებს გამოხატავენ. ამ სამი თვის განმავლობაში არ გამიგია არჩილ ჩიქოვანის, რიჟვაძის, ივანიშვილის და კობახიძის კრიტიკა, მაგრამ გამიგია ლევან ხაბეიშვილისა და ლევან ვარშალომიძის და სხვების, ეს ადამიანები თვითმმართველობაში არ გამოხატავენ პარტიის ინტერესს და რა თქმა უნდა, არ იქნებიან წარმოდგენილი ენმ-ს პარტიიდან”,- განაცხადა ლევან ანთაძემ.
„ერთიანი ნაციონალური მოძრაობის“ წევრების ნაწილის განცხადებით, ბათუმის საკრებულოში ლაშა კილაბერიას ადგილმონაცვლეების სიიდან ნიკა მელიას მხარდამჭერები: ლევან გორგილაძე, როინ დვალი, ელიზა ეფაძე და შორენა აბაშიძე ამოიღეს. როგორც მათ პარტიის ოფისში გამართულ ბრიფინგზე განაცხადეს, გადაწყვეტილება ლევან ხაბეიშვილმა მიიღო.
