ევროკავშირში უკრაინიდან მარცვლეულის ექსპორტთან დაკავშირებით კომპრომისს “მაქსიმალურად მიუახლოვდნენ”. ინფორმაციას

ამის შესახებ გერმანული გამოცემა Deutsche Welle ავრცელებს.

გამოცემის თანახმად, ლუქსემბურგში გამართულ შეხვედრაზე ევროკავშირის წევრი ქვეყნების სოფლის მეურნეობის მინისტრებმა უკრაინიდან მარცვლეულისა და სხვა პროდუქტების ექსპორტთან დაკავშირებით კონკრეტულ შეთანხმებას ვერ მიაღწიეს, მაგრამ “მაქსიმალურად მიუახლოვდნენ” დადებით გადაწყვეტილებას.

სოფლის მეურნეობის ევროკომისრის იანუშ ვოიცეხოვსკის განცხადებით, ყველაფერი მიანიშნებს იმაზე, რომ ევროკომისიის წინადადება მიღებული იქნება.

ცნობისთვის, ევროკომისიის წინადადება სამ ზომას ითვალისწინებს:

5 ივნისამდე უკრაინიდან ხუთი პროდუქტის იმპორტის აკრძალვას: სიმინდის, ხორბლის, რაფსის თესლების, მზესუმზირის თესლებისა და ზეთის. ამავდროულად, უკრაინული პროდუქციის ტრანზიტი გაგრძელდება და ევროკომისია ამას ხელს შეუწყობს;

კომპენსაციის 100 მილიონი ევრო გამოიყოფა ევროკავშირის ხუთი ქვეყნისთვის, რომლებიც ყველაზე მეტად დაზარალდნენ უკრაინული პროდუქციის იმპორტისგან. მათ შორის არიან პოლონეთი, რუმინეთი, ბულგარეთი, უნგრეთი და სლოვაკეთი. ეს დახმარების უკვე მეორე ტრანში იქნება. აქამდე 56 მილიონი ევროს ოდენობის კომპენსაცია სამ ქვეყანას გადაეცა - პოლონეთს, ბულგარეთსა და რუმინეთს.

მესამე ზომა ევროკავშირის შიდა ბაზარზე უკრაინიდან იმპორტირებული სხვა პროდუქციის შედეგად შექმნილი ვითარების გამოძიებას ითვალისწინებს. ასეთი რვა სახეობის პროდუქციაა, მათ შორის შაქარი, კვერცხი და თაფლი.

Deutsche Welle ასევე აღნიშნავს, რომ ევროკავშირის ზოგიერთი წევრი სახელმწიფო უკრაინიდან იმპორტის აკრძალვას ეწინააღმდეგება, მაგალითად ფინეთი და ლატვია.

“ყველაზე ცუდი ის არის, რომ უკრაინიდან პროდუქციის შემოტანაზე აკრძალვა რუსეთის ნარატივს აძლიერებს. არარაციონალურია ერთი მხრივ მასშტაბურ მხარდაჭერას უწევდე უკრაინას, და მეორე მხრივ - იქიდან ექსპორტს და კიევის ეკონომიკურ შესაძლებლობებს ბლოკავდე”, - განაცხადა ფინეთის სოფლის მეურნეობის მინისტრმა ანტი კურვინენმა.