თორნიკე რიჟვაძე - ხელისუფლება ძალიან მყარად აგრძელებს სამშვიდობო პოლიტიკის გატარებას და შესაბამისად, გვექნება წარმატებული ტურისტული სეზონი, შევინარჩუნებთ დადებით ეკონომიკურ ტენდენციებს
აჭარის ავტონომიური რესპუბლიკის მთავრობის თავმჯდომარემ, თორნიკე რიჟვაძემ 2023 წლის პირველი კვარტლის ეკონომიკური და ტურისტული ტენდენციები მიმოიხილა.
თორნიკე რიჟვაძემ აღნიშნა, რომ მაქსიმუმი გაკეთდება, რათა რადიკალურ ჯგუფების მიერ ტურისტული სეზონის დისკრედიტაცია არ მოხდეს.
„ყველას გახსოვთ, შარშან მიმდინარეობდა საზღვაო ტურისტული სეზონის მიზანმიმართული დისკრედიტაცია. პირველ რიგში „ნაციონალური მოძრაობის“ და მათთან დაკავშირებული რადიკალური ჯგუფების მიერ. მათ შორის, ზოგიერთი მედია საშუალებები, რომლებიც ფინანსდებიან ევროპელი პენსიონერების და ქართული ჯარის ნაძარცვი ფულით, ცდილობდნენ მაქსიმალურად მოეხდინათ სეზონის დისკრედიტაცია. თუმცა, ხელისუფლება ძალიან მყარად აგრძელებს სამშვიდობო პოლიტიკის გატარებას და შესაბამისად ჩვენ გვექნება წარმატებული ტურისტული სეზონი. ასევე, რა თქმა უნდა, შევინარჩუნებთ დადებით ეკონომიკურ ტენდენციას. მინდა აღვნიშნო, რომ ეს კონკრეტული ჯგუფები ახდენენ იმ ევროპული არჩევანის დისკრედიტაციასაც, რომელიც არის ქართველი ხალხის ისტორიული ნება და ეს მძარცველები ჩვენ გვიწუნებენ საგარეო კურს. თუმცა ვფიქრობ, მოსახლეობისთვის ცხადია რასთან გვაქვს საქმე და ჩვენ აუცილებლად, რეკომენდაციების შესრულების შემდეგ შევძლებთ, რომ გვქონდეს დადებითი შედეგები ყველა მიმართულებით“, - განაცხადა თორნიკე რიჟვაძემ.
აჭარის ავტონომიური რესპუბლიკის მთავრობის მიერ გავრცელებული ინფორმაციით, თორნიკე რიჟვაძემ აღნიშნა, რომ ხელისუფლების მიერ გატარებული სამშვიდობო პოლიტიკით, ევროპული კურსით, ეს ტენდენციები შენარჩუნებული იქნება და აღნიშნული ღონისძიებებით მოსახლეობა უფრო მეტ სარგებელს და კეთილდღეობას მიიღებს.
