ბათუმის საკრებულოს სხდომაზე „ერთიანი ნაციონალური მოძრაობის“ წევრმა რეზო ხარაზმა მმართველ გუნდს, ბათუმობის დღესასწაულისთვის მომზადებული მოსაწვევი წარუდგინა.

რეზო ხარაზმა განაცხადა, რომ აღნიშნულ მოსაწვევზე ბათუმში, მიხეილ სააკაშვილის მმართველობის დროს განხორციელებული პროექტები არის დატანილი.

"სიმბოლურია, ერთი ახალი პროექტი არ გაგიკეთებიათ, ვერ შეძელით. 135 წლის იუბილეს აღნიშნავთ და მოსაწვევზე ერთი ახალი პროექტი არ გაქვთ დატანილი. იმ კაცის მიერ განხორციელებული პროექტებით არის სავსე მოსაწვევი, რომელიც რუსეთის და ბორინკა ივანიშვილის პირადი პატიმარია. სიმბოლურია, რომ თანამედროვე ქალაქი სწორედ მიხელ სააკაშვილს უკავშირდება. ერთი პროექტი არ გაგიკეთებიათ, მაგრამ გეტყვით თქვენს მიერ შეჩერებულ პროექტებს - მაგალითად, “როიალ კარიბიანი”, რომელიც გააჩერეთ, ახალი ბულვარის განვითარება, შემოვლითი გზა, ტექნოლოგიურ უნივერსიტეტში ბორინკა ივანიშვილმა კაზინო გახსნა. ამაყი ვარ, რომ ამ ქალაქში დავდივარ. მადლობა იმ სამსახურს, რომელმაც ეს მოსაწვევი გააკეთა. ნახეთ თანამედროვე ბათუმი, რომელიც მიხეილ სააკაშვილმა მოგვცა. თავისუფლება მიშას”, - განაცხადა რეზო ხარაზმა.

სხდომათა დარბაზში ხარაზის განცხადებას მმართველი გუნდის მხრიდან რეპლიკები მოჰყვა. მათ რეზო ხარაზის განცხადებას ტაშით უპასუხეს.