წალენჯიხის მერია მთავრობას ინიციატივით მიმართავს მეორე კლასის მოსწავლეებისთვის კვება უფასო იყოს.

„უფასო კვება მეორე კლასის მოსწავლეებისთვის“ ინიციატივის შესახებ წალენჯიხის მერის მოადგილემ ვანო ბურდულმა განაცხადა.

მისივე ცნობით, პროექტის ფარგლებში მერია, ცენტრალური ხელისუფლებისგან ახალი სასწავლო წლისთვის 208 000 ლარის გამოყოფას ითხოვს.

„სტატისტიკის ეროვნული სამსახურის მიერ ჩატარებული კვლევის თანახმად, მოსწავლეთა 35% სკოლაში არასოდეს იკვებება. ამ გამოწვევის საპასუხოდ, წალენჯიხამ უკვე გადაგა პირველი ნაბიჯები და საკუთარი სახსრებიდან შევძელით 220000 ლარის გამოყოფა ბავშვთა კვების დასაფინანსებლად. ამჟამად უკვე 265 პირველკლასელია უზრუნველყოფილი კვებით.

ჩვენ ამაზე არ ვჩერდებით, ვინაიდან გამოწვევა გაცილებით მასშტაბური ხასიათისაა და გვინდა, რომ ახალი სასწავლო წლიდან განვახორციელოთ მეორეკლასელთა კვების დაფინანსებაც.

ამისათვის უკვე წინადადებით მივმართეთ საქართველოს მთავრობას მიზნობრივი 208 000 ლარის გამოყოფის თაობაზე.

იმედი გვაქვს, საქართველოს მთავრობა გაითვალისწინებს მოსახლეობის საჭიროებებს და დაგვეხმარება ამ მნიშვნელოვანი პრობლემის გადაჭრაში“, - განაცხადა ვანო ბურდულმა.