სამედიცინო ექსპერტების და ექიმების ორგანიზებით კონფერენცია სახელწოდებით "აქონდროპლაზიით დაავადებულთა მკურნალობის ახალი ხედვა" მიმდინარეობს.
ორგანიზატორების განმარტებით, შეხვედრა ონლაინ ფორმატით იმართება და მას სხვადასხვა ქვეყნიდან სამედიცინო სფეროს წარმომადგენლები ესწრებიან.
საქართველოს პარლამენტის ყოფილი წევრის, ექიმ მანანა ჯებაშვილის განცხადებით, ეს არის სასწრაფოდ მოწყობილი კონფერენცია, რომელიც აქონდროპლაზიის დაავადების მქონე ბავშვების მკურნალობის ახალ ხედვებს ეძღვნება.
„კონფერენციაში მონაწილეობას იღებენ, როგორც უცხოელი, ასევე ქართველი სპეციალისტები. კონფერენციის დაგეგმვის მიზეზი გახლავთ, ის, რომ ამ პაციენტებთან დაკავშირებით მრავალი სიცრუე ვრცელდება. ჩვენ გვსურს, რომ ამ უამრავ სიცრუეში მართალი სიტყვა პროფესიონალებმა თქვან. ჰოპკინსის უნივერსიტეტის პროფესორი, მაჩაიძე იტყვის, როგორ მკურნალობენ წარმატებით მსგავსი დაავადების მქონე ბავშვებს. სხვადასხვა ქვეყნის ექსპერტები დღევანდელ კონფერენციაზე დაადასტურებენ, რომ ეს წამალი არის სანდო, უსაფრთხო და ეფექტური”, - განაცხადა მანანა ჯებაშვილმა.
აქონდროპლაზიის დაავადების მქონე ბავშვის ერთ-ერთი მშობლის, ლია შალვაშვილის თქმით, მისთვის მნიშვნელოვანია მსგავს კონფერენციაში მონაწილეობა მიიღოს.
„კონფერენციაში მონაწილეობენ, როგორც ქართველი ექიმები, ასევე ის ექიმები, რომლებიც წარმატებით მოღვაწეობენ უცხოეთში. გარდა ამისა, სამ წელიწად ნახევარია პირადად ჩართული ვარ და იმ უცხოელ ექიმებთან კონტაქტი მაქვს, ვინც აქონდროპლაზიას წარმატებით მკურნალობენ. მათ საკმაოდ კარგი პრაქტიკა და შედეგები აქვთ”, - განაცხადა ლია შალვაშვილმა.
