ფოთის 70-ე საოლქო საარჩევნო კომისიის თავმჯდომარის, სალომე როდონაიას ინფორმაციით, საოლქო კომისიაში ერთი საჩივარია შესული.

მისი თქმით, საჩივარში წერია, რომ ამომრჩეველმა ბიულეტენი ვერ მოათავსა ხმის დამთვლელ აპარატში და მას ერთ-ერთი დამკვირვებელი დაეხმარა. მისივე თქმით, ფოთში შუალედური არჩევნები მშვიდ ვითარებაში მიმდინარეობს და ამ დროის მონაცემებით ამომრჩეველთა აქტივობა ნორმალურია.

„ამ დროისთვის ფოთის საოლქო საარჩევნო კომისიაში შემოსულია ერთი საჩივარი და ეს არის „სამართლიანი არჩევნების" საჩივარი, რომელშიც კონკრეტულად მითითებული არის, რომ ამომრჩეველმა ვერ განახორციელა ბიულეტენის მოთავსება ხმის დამთვლელ აპარატში და მას დაეხმარა სადამკვირვებლო ორგანიზაციის წარმომადგენელი. საოლქო კომისია განიხილავს ამ საჩივარს შესაბამის ვადებში. რაც შეეხება უბნებზე ვითარებას, 06: 45 საათზე ყველა უბანი იყო გახსნილი, ყველა პროცედურა, რაც დაკავშირებული იყო წილისყრის პროცედურებთან ჩატარდა კანონის დაცვით. ხოლო რაც შეეხება ელექტრონულ ტექნოლოგიებს, იყო მცირედი ტექნიკური ხარვეზები, თუმცა ამას არანაირი გავლენა არ მოუხდენია შედეგებზე ამ დროისათვის და ჩვეულებრივად. ყველა საარჩევნო უბანზე პროცესი მიმდინარეობს მშვიდ ვითარებაში. ამ დროის მონაცემებით აქტივობა არის ნორმალური, ასე რომ, დაველოდოთ პროცესებს და გვეცოდინება საბოლოო შედეგები”,- განაცხადა სალომე როდონაიამ.