ზუგდიდის ბაზარში დასაქმებული მოქალაქეების აქციამ მერიის ადმინისტრაციულ შენობასთან გადაინაცვლა. აქციის მონაწილეები მერთან, მამუკა წოწორიასთან შეხვედრას ითხოვენ. მათი განცხადებით, უნდა აიკრძალოს გარევაჭრობა და ეს პრობლემა ხელისუფლებამ უნდა მოაგვაროს. აქციის მონაწილეებს მერის მოადგილე ბესიკ ჭეჟია შეხვდა.

ჭეჟიას განცხადებით, მერია უახლოეს პერიოდში აპირებს პრობლემის მოგვარებას შიდა და გარე ვაჭრობასთან დაკავშირებით. მისი თქმით, მოხდება ალტერნატიული ფართების მოძიება, სადაც მოვაჭრეები განთავსდებიან.

,,მერია აკეთებს ყველაფერს იმისათვის, რომ ეს პრობლემა ერთხელ და სამუდამოდ იქნეს გადაჭრილი. ამ ადამიანების მოთხოვნა სამართლიანია მეტწილად, რადგან ისინი შიგნით, ბაზრის ტერიტორიაზე ვაჭრობენ, მაგრამ ის ადამიანები, რომლებიც ბაზრის გარე პერიმეტრზე ეწევიან პროდუქციის რეალიზებას, ვერც მათზე მოვახდენთ ასე ერთი ხელის მოსმით ზემოქმედებას, რადგან ყველა მოქალაქე ჩვენთვის არის ერთნაირი, თუმცა პრობლემა აუცილებლად უნდა მოგვარდეს. მერია მუშაობს ამ პრობლემის მოგვარებაზე, ალტერნატიული ადგილების განსაზღვრაზე და უახლოეს დღეებში ისეთი გადაწყვეტილება იქნება მიღებული, რომელიც ორივე მხარისთვის იქნება მისაღები,“- განაცხადა ბესიკ ჭეჟიამ.

ზუგდიდის ბაზარში დასაქმებული მოქალაქეები გარევაჭრობის აკრძალვის მოთხოვნით აქციას დილიდან მართავენ. აქციის მონაწილეებმა, პროტესტის ნიშნად ბაზრის შესასვლელი კარი ჩაკეტეს. შეკრებილებმა ქუჩის გადაკეტვაც სცადეს, მაგრამ ადგილზე მყოფმა სამართალდამცველებმა მათ ამის უფლება არ მისცეს.