არანაირი საფუძველი არ არსებობს, რომ თქვენ, პირადი გადაწყვეტილებით, გააქრეთ, წაშალეთ საგამოძიებო კომისიის შექმნის საკითხი, რომელიც კენჭსაყრელ საკითხებში იყო - ბატონო სპიკერო, მზად ხართ, თქვენს უმრავლესობასთან ერთად მთელ "კლანს" გადაეფაროთ, - ასე მიმართა პარლამენტის ოპოზიციონერმა დეპუტატმა ხათუნა სამნიძემ პარლამენტის თავმჯდომარეს, შალვა პაპუაშვილს პარლამენტის პლენარულ სხდომაზე, რომლის დღის წესრიგში კენჭსაყრელ საკითხთა ნუსხაში, სასამართლოს საკითხზე დროებითი საგამოძიებო კომისიის შექმნის საკითხი შეტანილი არ არის. სამნიძის აზრით, აღნიშნული საკითხის დღის წესრიგიდან ამოღება ერთპიროვნული გადაწყვეტილებაა.

„რატომ თვლით, რომ გაქვთ უფლება, ერთპიროვნულად გადაწყვიტოთ და ყოველგვარი საფუძვლის გარეშე კენჭსაყრელი საკითხებიდან გააქროთ საკითხი, რომელსაც აქვს მაღალი საზოგადოებრივი ინტერესი, რომელიც უკვე განხილულია და მისი ამოღების ერთადერთი საფუძველი არის უმრავლესობის შიში, რომ ამ პარლამენტში არ შეიქმნას საგამოძიებო კომისია, რომელიც შეისწავლის სასამართლო სისტემაში წარსულში და დღეს არსებულ საშინელ ვითარებას? მზად ხართ, ბატონო სპიკერო, თქვენს უმრავლესობასთან ერთად გადაეფაროთ მთელ კლანს. 50 ხმა არის და იყო მთელი კვირის განმავლობაში. უნდა დაფიქრდეთ, როდესაც სანქციებზეა ლაპარაკი, რომ "კლანის" ნაწილია თითოეული მაღალჩინოსანი, ვინც ამ საგამოძიებო კომისიის შექმნას გადაეფარება“,- განაცხადა ხათუნა სამნიძემ.