„ერთიანი ნაციონალური მოძრაობის“ თავმჯდომარე ლევან ხაბეიშვილი, ირაკლი ნადირაძე და პარლამენტის ფრაქცია „ერთიანი ნაციონალური მოძრაობის“ დეპუტატი, სულხან სიბაშვილი დღეს პარტიის ცენტრალურ ოფისში თბილისის ორგანიზაციის წევრებს შეხვდნენ.

ინფორმაციას პარტიის პრესსამსახური ავრცელებს.

მათივე ინფორმაციით, შეხვედრაზე საუბარი შეეხებოდა საქართველოს ყოფილი პრეზიდენტის, მიხეილ სააკაშვილის სიცოცხლის გადარჩენას, პოლიტპატიმრებს, პარტიის გაძლიერების გზებს, შიდაპარტიულ არჩევნებს, ქვეყანაში და თბილისში მიმდინარე საკითხებს.

„დასავლეთ საქართველოს პარტიის თავმჯდომარეების შემდეგ, შევხვდით აღმოსავლეთის რაიონებში პარტიის თავმჯდომარეებს, ვემზადებით არჩევნებისთვის. ცხადია, ვხვდებით დედაქალაქში ჩვენს ამომრჩეველს, ლიდერებს, დამკვირვებლებს, იმ ადამიანებს, ვინც წარმოადგენენ „ნაციონალურ მოძრაობას“ თბილისში. ასევე ვსაუბრობთ პრეზიდენტ სააკაშვილის თავისუფლების მნიშვნელობაზე, მისი სიცოცხლის გადარჩენაზე, პარტიის გაძლიერების გზებზე, სტრატეგიაზე. ერთობლივად ვყალიბდებით იმაზე, თუ რა ფორმით, რა გზით უნდა იაროს „ნაციონალურმა მოძრაობამ“, რომ კიდევ უფრო გაძლიერებული, ჯანსაღი იყოს და საბოლოოდ, რუსი ოლიგარქის რეჟიმის დამარცხებას მივაღწიოთ“, - განაცხადა ლევან ხაბეიშვილმა

„ვაგრძელებთ აქტიურ შეხვედრებს თბილისის ორგანიზაციის წევრებთან და მის მხარდამჭერებთან, ვსაუბრობთ, რა თქმა უნდა, მიხეილ სააკაშვილზე, პოლიტპატიმრებზე, ქვეყანაში და თბილისში მიმდინარე საკითხებზე, პარტიის გაძლიერებაზე. რა თქმა უნდა, თბილისი უნდა იყოს ის, ვინც გადამწყვეტი სიტყვა უნდა თქვას რუსი ოლიგარქის, ბიძინა ივანიშვილის რეჟიმის დასამარცხებლად“, - განაცხადა თბილისის საკრებულოს ფრაქცია „ერთიანი ნაციონალური მოძრაობის“ თავმჯდომარემ, ირაკლი ნადირაძემ.

„დღეს შევხვდით პარტიის აქტივს, მხარდამჭერებს, ვისაუბრეთ მიმდინარე პოლიტიკურ მოვლენებზე, პარტიის გეგმებზე. ძალიან ინტერაქციული იყო შეხვედრა, ყველას საინტერესო იდეები მოდის, თუ როგორ უნდა განვითარდეს პარტია და ჩვენ გავაგრძელებთ შეხვედრებს თბილისის ორგანიზაციასთან“, - განაცხადა პარლამენტის ფრაქცია „ერთიანი ნაციონალური მოძრაობის“ დეპუტატმა, სულხან სიბაშვილმა.