მარნეულის მუნიციპალიტეტის ხელმძღვანელმა პირებმა ფაშიზმზე გამარჯვების 78 წლისთავთან დაკავშირებით სოფელ ქვემო სარალში, ხოჯორნსა და სადახლოში მეორე მსოფლიო ომის გმირთა მემორიალები გვირგვინებით შეამკეს. ამის შესახებ ინფორმაციას მარნეულის მერია ავრცელებს.

აღსანიშნავია, რომ საქართველოს მთავრობის განკარგულებით, ფაშიზმზე გამარჯვების 78-ე წლისთავთან დაკავშირებით, მეორე მსოფლიო ომის მონაწილეები ერთჯერადად 1000 ლარს, ხოლო მეორე მსოფლიო ომში დაღუპულთა ოჯახის წევრები - 500 ლარს მიიღებენ.

განკარგულებას საქართველოს პრემიერ-მინისტრმა ირაკლი ღარიბაშვილმა ხელი უკვე მოაწერა.

„ჩვენს გმირ ვეტერანებს ვულოცავ ფაშიზმზე გამარჯვების 78-ე წლისთავს. ისინი იბრძოდნენ მსოფლიოს უკეთესი მომავლისთვის.

თარიღთან დაკავშირებით, ვიმყოფებოდით სოფელ ქვემო სარალში, ხოჯორნსა და სადახლოში სადაც 9 მაისის მემორიალები გვირგვინებით შევამკეთ.

ჩვენი ვალია არ დავივიწყოთ გმირების ღვაწლი სამშობლოს წინაშე!", - განაცხადა მარნეულის მუნიციპალიტეტის მერმა, კენან ომაროვმა.