2022 წელს, საქართველოში, ნარკოტიკებითა და ფსიქოდისლეპსიური საშუალებებით (ჰალუცინოგენებით) მოწამვლის შედეგად სტაციონარულ დაწესებულებებში ჰოსპიტალიზაციის 2151 შემთხვევა დაფიქსირდა.

ამის შესახებ „ინტერპრესნიუსს“ დაავადებათა კონტროლისა და საზოგადოებრივი ჯანმრთელობის ეროვნული ცენტრიდან საჯარო ინფორმაციის გამოთხოვნის პასუხად აცნობეს.

უწყების ინფორმაციით, მათგან ყველაზე მეტი - 2109 შემთხვევა თბილისში დაფიქსირდა. აჭარაში - 5, გურიაში - 4 , იმერეთში - 17, კახეთში - 3, მცხეთა-მთიანეთში 3, სამეგრელო და ზემო სვანეთში - 3, ქვემო ქართლში - 2, შიდა ქართლში კი 5 შემთხვევა აღირიცხა.

რაც შეეხება გასულ წლებს, დაავადებათა კონტროლისა და საზოგადოებრივი ჯანმრთელობის ეროვნული ცენტრის ინფორმაციით, 2021 წელს ნარკოტიკებითა და ფსიქოდისლეპსიური საშუალებებით (ჰალუცინოგენებით) მოწამვლის შედეგად სტაციონარულ დაწესებულებებში ჰოსპიტალიზაციის 1610 შემთხვევა აღირიცხა, 2020 წელს 1334, 2019 წელს კი 1421.