"ევროპული საქართველოს" ლიდერის გიგა ბოკერიას განცხადებით, პრეზიდენტ სალომე ზურაბიშვილის სიტყვებს ფასი ეკარგება მაშინ, როცა მის განცხადებებს საქმე არ ახლავს და პრეზიდენტი თავის ინსტრუმენტებს არ იყენებს.

როგორც ბოკერიამ ჟურნალისტებს განუცხადა, ამის გათვალისწინებით, მისთვის მნიშვნელოვანი არ არის, იქნება თუ არა პრეზიდენტი ბრიუსელში დაგეგმილი ვიზიტისას ხელისუფლების მისამართით კრიტიკული.

"ჩემთვის არსებითი არ არის, იქნება თუ არა ის კრიტიკული, ალბათ, იქნება. დამოუკიდებლობის დღეს მისი გამოსვლა 10-დან 9 საკითხში ჩემი, როგორც მოქალაქის პოზიციას ემთხვევა, ოღონდ, როცა მერე სიტყვა საქმეში არ გადადის, როცა ის არ იყენებს იმ ინსტრუმენტს, რომელიც აქვს, რომელსაც "ქართული ოცნება" ვერ აკონტროლებს და პოლიტიკურ დევნაზე ამ ინსტრუმენტს არ იყენებს, აქედან გამომდინარე, მის სიტყვას ჩემთვის ფასი ეკარგება", - განაცხადა ბოკერიამ.

ცნობისთვის, სალომე ზურაბიშვილი ბრიუსელში, ევროპარლამენტს 31 მაისს მიმართავს.