თბილისის სახელმწიფო უნივერსიტეტის ინფორმაციით, რექტორის, აკადემიკოს ჯაბა სამუშიას ინიციატივით, მომავალი წლიდან ქართველ ქიმიკოსთა დღეს თსუ 11 ივლისს, უნივერსიტეტის პირველი რექტორის, საქართველოში ქიმიის მეცნიერების ფუძემდებლის პეტრე მელიქიშვილის დაბადების დღეს აღნიშნავს. მათი ცნობით, ამის შესახებ ინფორმაცია უნივერსიტეტში ქიმიკოსების შეხვედრაზე გახდა ცნობილი.
„ღონისძიებას დაესწრნენ თსუ კურსდამთავრებული ქიმიკოსები, რომლებიც მუშაობენ ისეთი მიმართულებებით, როგორიცაა აგროქიმია, ასტროქიმია, ბიოქიმია, გეოქიმია, ჰიდროქიმია, ქიმიური აღჭურვილობის ინჟინერია, მეტალურგია, კვების პროდუქტების წარმოება, ნავთობქიმია, რადიოქიმია, ნანოქიმია, ფარმაცევტული ქიმია, სასამართლო ექსპერტიზა, ელექტროქიმია, ეკოლოგია და სხვა.
შეხვედრაზე მადლობის სიგელები გადაეცათ წარმატებულ და ღვაწლმოსილ ქიმიკოსებს. ღონისძიებას თსუ ზუსტ და საბუნებისმეტყველო მეცნიერებათა ფაკულტეტის პროფესორები, სტუდენტები ესწრებოდნენ“, - ნათქვამია ინფორმაციაში.
