აშშ-მა, რუსული თვითმფრინავების სახიფათო და არაპროფესიონალური ქცევის გამო, F-22 ტიპის გამანადგურებლები ახლო აღმოსავლეთში განალაგა

შეერთებულმა შტატებმა, რუსული თვითმფრინავების სახიფათო და არაპროფესიონალური ქცევის გამო, F-22 ტიპის გამანადგურებელი თვითმფრინავები ახლო აღმოსავლეთში განათავსა, - ინფორმაციას CNN-ი აშშ-ის ცენტრალურ სარდლობაზე დაყრდნობით ავრცელებს.

„რუსული ძალების სახიფათო და არაპროფესიონალური ქცევა არ არის ის, რასაც პროფესიონალი საჰაერო ძალებისგან ველით. მათ მიერ საჰაერო სივრცეში კონფლიქტური სიტუაციების აღმოფხვრის მიზნით შეთანხმებული ზომების რეგულარული დარღვევა ზრდის ესკალაციის ან არასწორი გათვლების რისკს. ჩვენი პარტნიორებისა და მოკავშირეების გვერდით, ჩვენ მზად ვართ გავაუმჯობესოთ უსაფრთხოება და სტაბილურობა რეგიონში“, - განაცხადა აშშ-ის ცენტრალური სარდლობის მეთაურმა, გენერალმა მაიკლ კურილამ.

აშშ-ის ცენტრალურ სარდლობაში განმარტავენ, რომ F-22 ტიპის გამანადგურებლების სწრაფი განლაგება და კოალიციის ოპერაციებში ინტეგრაცია არის აშკარა დემონსტრირება, რომ პარტნიორები, მოკავშირეები და აშშ რეგიონში გრძელვადიანი მშვიდობისა და სტაბილურობის მიმართ ერთგულები არიან.