ოპოზიციურმა ფრაქციამ - „ერთიანმა ნაციონალურმა მოძრაობამ", კიდევ ერთხელ აჩვენა სახე თუ უსახობა, - ამის შესახებ აჭარის ავტონომიური რესპუბლიკის უმაღლესი საბჭოს ფრაქცია „ქართული ოცნების“ თავმჯდომარემ, გიორგი მანველიძემ განაცხადა.

მისივე თქმით, „ნაციონალური მოძრაობის“ ქმედებები ყოველთვის გამომდინარეობდა მერკანტილური ინტერესებიდან.

„ომის პარტიისგან, რა თქმა უნდა არაფერს ველოდებოდით, გარდა წარმოდგენის დადგმისა. როგორც ყოველთვის, დღევანდელ სხდომაზეც შემოვიდნენ შოუს დასადგმელად, ვიწრო, პარტიული ინტერესების გასატარებლად.

ოპოზიციურმა ფრაქციამ - „ერთიანმა ნაციონალურმა მოძრაობამ“, კიდევ ერთხელ აჩვენა სახე თუ უსახობა - მათი ქმედებები ყოველთვის გამომდინარეობდა მერკანტილური ინტერესებიდან. ხალხის ინტერესების უგულებელყოფა ამ პარტიის მთავარი ნიშაა. ცდილობენ, მავნებლური, ქვეყნისათვის დამაზიანებელი მეთოდებით, რომლებითაც მათი მმართველობის პერიოდში ხელმძღვანელობდნენ, გააგრძელონ ქვეყნის არასწორ რელსებზე გადაყვანა, თუმცა, დღეს, მორიგი წარუმატებელი მცდელობა ჰქონდათ.

ყველაფერს აკეთებენ ტურისტული სეზონის ჩასაშლელად, რაც რეგიონის, ქვეყნის გაძლიერებისთვის მნიშვნელოვანი მიმართულებაა.

არც ქვეყნის იმიჯის შელახვა გამოგივათ ბატონებო, არც ქვეყნის განვითარების შეჩერება და ვერც მავნებლური ინტერესების დაკმაყოფილებას შეძლებთ.

„ქართული ოცნება“, მისი გუნდი, ყველაფერს გავაკეთებთ ქვეყნის ეკონომიკური გაძლიერების, სოციალური საკითხების მოგვარების, მოსახლეობის ინტერესების გატარებისა თუ კანდიდატის სტატუსის მისაღებად და დარწმუნებული ვარ, დასახულ მიზნებს, თანმიმდევრული, მშვიდობიანი პოლიტიკით აუცილებლად მივაღწევთ”, - განაცხადა გიორგი მანველიძემ.