მინისტრის 40-გვერდიან ანგარიშში არის მცდელობა, საამური ცხოვრების სურათი წარმოაჩინოს - ტერიტორიული მთლიანობის უზრუნველყოფის კუთხით ჩანაწერები ცარიელი ტექსტია, 7 თვის მანძილზე ისიც არ გააკეთა, რომ ბიჭვინთის ანექსიის პროცესი დაეგმო, - ამის შესახებ ოპოზიციონერმა დეპუტატმა თეონა აქუბარდიამ განაცხადა.

მისი თქმით, ილია დარჩიაშვილთან, რომელსაც დღეს პარლამენტში მოუსმენენ, კითხვები ბევრ საკითხზე აქვს და ერთ-ერთი მთავარი არის ევროინტეგრაცია.

"სტატუსის მიღების სურვილი, ისევე როგორც მოსახლეობის 90 პროცენტს, მეც მაქვს, თუმცა ეს არ არის დაბადების დღის საჩუქარი, რომ ვინმემ უბრალოდ გვიბოძოს. ჩვენ გვითხრეს, რომ ამას სჭირდება 12 რეკომენდაციის შესრულება, რაც ვხედავთ, რომ მნიშვნელოვანი პრობლემაა "ქართული ოცნების" პოლიტიკური ნების არქონის გამო. ნაცვლად მეგობრებთან მჭიდრო პარტნიორობისა, ვხედავთ მათგან კრიტიკას და ძაგებას. ამ მოცემულობაში, ძალიან გართულდება პარტნიორების დარწმუნება მიუხედავად მცდელობებისა, რომ ძალიან მნიშვნელოვანია ქვეყნისთვის სტატუსი და ამ პროცესზე სრული პასუხისმგებლობა ეკისრება "ქართულ ოცნებას", - განაცხადა აქუბარდიამ.