ყოფილი სამხედრო მოსამსახურეები აჭარის მთავრობის სახლთან აქციებს გეგმავენ და თორნიკე რიჟვაძისგან ბოდიშის მოხდას ითხოვენ
ყოფილი სამხედრო პირების განცხადებით, აჭარის მთავრობის თავმჯდომარე არ შეხვდა.
მათი თქმით, თორნიკე რიჟვაძემ აგვისტოს ომთან დაკავშირებით გაკეთებულ განცხადებაზე კატეგორიული ბოდიში უნდა მოიხადოს.
როგორც ომისა და სამხედრო ძალების ვეტერანი არჩილ ჯაფარიძე აცხადებს, თორნიკე რიჟვაძე ბოდიშს თუ არ მოიხდის თანამდებობა დატოვოს.
ყოფილი სამხედრო პირები ამბობენ, რომ მსგავსი მოთხოვნით კვლავ შეიკრიბებიან.
"თორნიკე რიჟვაძემ ბოდიში მოიხადოს! ვინც არ უნდა ყოფილიყო მაშინ პრეზიდენტი, ვინც არ უნდა ყოფილიყო ქვეყნის ლიდერი, ჩვენ მაინც ვიომებდით. თუნდაც დღეს რომ რუსები შემოვიდნენ, ყველა მზად ვართ საბრძოლველად, ბიძინა ივანიშვილსაც დავუდგებით გვერდით და ვიომებთ. არა აქვს მნიშვნელობა, ვინ იქნება ქვეყნის მმართველი. ჩვენ ვართ სამხედროები და ვემიჯნებით ყოველგვარ პოლიტიკას. ვითხოვთ, რიჟვაძემ კატეგორიული ბოდიში მოიხადოს ან თანამდებობიდან გადადგეს! ომს გმირები ეწირებიან და თორნიკე რიჟვაძისნაირი ტიპები მართავენ ქვეყანას, გამგები გაიგებს რაც ახლა ვთქვი, - განაცხადა ომისა და სამხედრო ძალების ვეტერანმა არჩილ ჯაფარიძემ.
