სამოქალაქო საზოგადოების ნაწილი, საქართველოს ხელისუფლებას საჯაროდ მოუწოდებს, ადამიანის უფლებათა სამოქალაქო გეგმის შემუშავების პროცესში სამოქალაქო საზოგადოების ჯეროვანი ჩართულობის ფორმატი უზრუნველყოს. ამის შესახებ მესამე სექტორის წარმომადგენლებმა ერთობლივ პრესკონფერენციაზე განაცხადეს.

"საქართველოს ახალგაზრდა იურისტთა ასოციაციის" ადამიანის უფლებათა დაცვის პროგრამის დირექტორის, თამარ ონიანის განცხადებით, არასამთავრობო სექტორი საქართველოს ხელისუფლებას ასევე მოუწოდებს, შეწყვიტოს სამოქალაქო საზოგადოებისთვის სივრცის შემავიწროებელი პრაქტიკა და არ დაუპირისპირდეს საქართველოს კონსტიტუციითა და საერთაშორისო აქტებით განსაზღვრულ ღირებულებათა წესრიგს.

"ჩვენ გვჯერა, რომ ჭეშმარიტად ინკლუზიური პროცესი შექმნის უკეთეს სამოქმედო გეგმას, რომელიც სარგებელს მოუტანს თითოეულ ადამიანს. ეს განსაკუთრებით მნიშვნელოვანია იმის გათვალისწინებით, რომ საზოგადოების ზოგიერთი განსაკუთრებით დაუცველი ჯგუფი, მათ შორის ლგბტქი ადამიანები და მათი საჭიროებები საერთოდ არ არის სტრატეგიაში ნახსენები.

კიდევ ერთხელ ვადასტურებთ, რომ ჩვენი, სამოქალაქო ორგანიზაციების საქმიანობის მთავარი მიზანი ევროკავშირის წევრობის კანდიდატი ქვეყნის სტატუსის მოპოვებისთვის მაქსიმალური ძალისხმევის გაწევაა. სწორედ აღნიშნულიდან გამომდინარე, 2024 წლის 31 ივლისს გამოვაქვეყნებთ მოსაზრებას, რომელთა გათვალისწინებითაც ადამიანის უფლებათა სამოქმედო გეგმის შემუშავების პროცესში დემოკრატიული, სამართლებრივი და სოციალური სახელმწიფოს დამკვიდრებისთვის მიზანშეწონილად მიგვაჩნია“, - განაცხადა თამარ ონიანმა.

ხელისუფლებას შემდეგი არასამთავრობო ორგანიზაციები მიმართავენ: „საქართველოს ახალგაზრდა იურისტთა ასოციაცია", "ქალები საერთო მომავლისთვის - საქართველო", "უფლებები საქართველო", "ადამიანის უფლებათა ცენტრი", "ღია სივრცე კავკასია", "კანონის უზენაესობის ცენტრი", "პარტნიორობა ადამიანის უფლებებისთვის, დემოკრატიისა და მმართველობის ცენტრი", "თანასწორობის მოძრაობა", "ქალთა ინიციატივების მხარდამჭერი ჯგუფი", "თანასწორობა 17", "ქვიარ ასოციაცია - თემიდა", ასოციაცია "ანიკა", ასოციაცია "დეა", "საქართველოს დაუნის სინდრომის ასოციაცია", "თანასწორობა თანაბარი უფლებებისთვის", "ფსიქიატრის სერვისი მომხმარებელთა და გადარჩენილთა საქართველოს ქსელი", "საქართველოს ფსიქიკური ჯანმრთელობის ასოციაცია", "კოალიცია დამოუკიდებელი ცხოვრებისთვის", "სოლიდარობის თემი", "ოჯახები დისკრიმინაციის წინააღმდეგ", ა/ო "ვიმეგობროთ", მოძრაობა "ინკლუზიური საზოგადოება საქართველო".