ირაკლი კობახიძე „ნაციონალურ მოძრაობაზე“ - მათ ბუნებრივია, აღიზიანებთ, როცა ის სახელი ერქმევათ, რომელიც სინამდვილეში უნდა ერქვათ - ეს არის ომის პარტია, რეგრესის პარტია, ეს არის პარტია, რომელიც დაკავშირებულია ყველანაირ მტრობასთან

ოპოზიციის მხრიდან საგნობრივი შეკითხვა დაისვა ინფრასტრუქტურაზე 2, საგარეო თემებზე 3 უხარისხო შეკითხვა დაისვა და თავდაცვაზე 1 უხარისხო შეკითხვა - მათ არ დაუსვამთ არც ერთი რეალური შეკითხვა ქვეყნის განვითარებასთან დაკავშირებით, რაც კიდევ უფრო აჩვენებს მათ სახეს, - ამის შესახებ „ქართული ოცნების“ თავმჯდომარემ, ირაკლი კობახიძემ ჟურნალისტებთან საუბრისას განაცხადა, რა დროსაც პარლამენტში საქართველოს პრემიერ-მინისტრ ირაკლი ღარიბაშვილის ყოველწლიური მოხსენება შეაფასა.

მისივე თქმით, ოპოზიციის მიერ კითხვების დასმის სტატისტიკა აჩვენებს, რომ ისინი სინამდვილეში ინტელექტუალურადაც არ არიან მომზადებული, რომ რაიმე ტიპის საგნობრივ დებატებში ჩაერთონ.

კობახიძის განცხადებით, ოპოზიციას საქართველოს არანაირი სიკეთე არ უხარია, მათ შორის სპორტის მიმართულებით.

„მე პატარა სტატისტიკა ვაწარმოე სხდომის დროს და მინდა გითხრათ რამდენი კითხვა დაისვა სხვადასხვა თემასთან დაკავშირებით. ეკონომიკასთან დაკავშირებით დაისვა 0 შეკითხვა, ენერგეტიკა - 0 შეკითხვა, რეგიონული განვითარება - 0 შეკითხვა, სოფლის მეურნეობის საკითხები - 0 შეკითხვა. ტურიზმი - 0 შეკითხვა, ჯანდაცვა - 0 შეკითხვა, სოციალური დაცვის და დახმარების საკითხები - 0 შეკითხვა, განათლება - 0 შეკითხვა, კულტურა - 0 შეკითხვა, სპორტი - 0 შეკითხვა. ოპოზიციის მხრიდან, საგნობრივი შეკითხვა დაისვა ინფრასტრუქტურაზე 2, საგარეო თემებზე 3 უხარისხო შეკითხვა დაისვა და თავდაცვაზე 1 უხარისხო შეკითხვა. ეს არის ოპოზიციის სტატისტიკა, რაც აჩვენებს, რომ სინამდვილეში არც ინტელექტუალურად არ არის ოპოზიცია მომზადებული, რომ ჩაერთოს რაიმე ტიპის საგნობრივ დებატებში და საერთოდ არ აინტერესებთ ამ ადამიანებს ქვეყნის განვითარება,“ - განაცხადა კობახიძემ.

მისივე განცხადებით, ე.წ. კოლექტიური „ნაცმოძრაობა“ ომის პარტიაა, რომელსაც ქვეყნისთვის ცუდის მეტი არაფერი უნდა.

„რა თქმა უნდა, ეს კოლექტიური „ნაცმოძრაობა“ ღიზიანდება, როდესაც მათ საკუთარ სახელს არქმევენ. ეს არის ჩვეულებრივი ომის პარტია, რომელსაც ქვეყნისთვის ცუდის მეტი არაფერი უნდა. ეს არის რეალობა და ამაზე მოუწია კიდევ ერთხელ, რა თქმა უნდა, პრემიერს აქცენტის გაკეთება. ამაზე ღიზიანდებიან კოლექტიური „ნაცმოძრაობის“ წარმომადგენლები, იმიტომ რომ მათ ყველაზე კარგად იციან, რომ სინამდვილეში, ისინი მტრობენ ჩვენს ქვეყანას. ამას აკეთებდნენ ისინი, როცა იყვნენ ხელისუფლებაში 9 წლის განმავლობაში და ამას აკეთებენ ახლა, ამ 11 წლის განმავლობაში, ოპოზიციაში. მათ ბუნებრივია აღიზიანებთ, როდესაც ის სახელი ერქმევათ, რომელიც სინამდვილეში უნდა ერქვათ, ეს არის ომის პარტია, რეგრესის პარტია, ეს არის პარტია, რომელიც დაკავშირებულია ყველანაირ მტრობასთან ჩვენი ქვეყნის მიმართ,“ - განაცხადა კობახიძემ.