მარნეულის მუნიციპალიტეტის თვითმმართველობა „ახალგაზრდული იდეების კონკურსის" ფარგლებში პროექტების მიღებას იწყებს. ამის შესახებ ინფორმაციას მარნეულის მერია ავრცელებს.

მათი ცნობით, პროექტების წარდგენა შეუძლიათ:

მარნეულის მუნიციპალიტეტში რეგისტრირებული 18-დან - 30 წლამდე საქართველოს მოქალაქეს, რომელსაც არ აქვს მოპოვებული პროგრამით გათვალისწინებული პროექტების მიზნის შესაბამისი დაფინანსება ,,დონორის'' მიერ, ადგილობრივ არასამთავრობო ორგანიზაციას, რომელიც მარნეულის მუნიციპალიტეტში ახორციელებს ამ პროგრამის მიზნის შესაბამის პროექტს და მარნეულის მუნიციპალიტეტში რეგისტრირებული 18-დან 30 წლამდე საქართველოს მოქალაქეების მიერ შექმნილი საინიციატივო ჯგუფებს.

მარნეულის მერიის ინფორმაციით, წარმოდგენილი პროექტის იდეა უნდა შეესაბამებოდეს ჩამოთვლილი მიზნებიდან ერთ-ერთს: მოქალაქეობრივი ცნობიერების ამაღლება და ინტეგრაცია, ჯანსაღი ცხოვრების წესის პოპულარიზაცია, გარემოს დაცვა და სპეციალური საჭიროების მქონე ახალგაზრდების მხარდაჭერა. თითოეული პროექტი შესაძლებელია დაფინანსდეს არაუმეტეს 3000 ლარით. წარმოდგენილ საპროექტო განაცხადს სპეციალური კომისია განიხილავს.

პროექტის შემოტანა აპლიკანტს შეუძლია მარნეულის მუნიციპალიტეტის მერიის კანცელარიაში, ან ელექტრონულად მარნეულის მუნიციპალიტეტის მერიის ოფიციალურ ელ. ფოსტაზე: municipaliteti@marneuli.gov.ge .

პროექტების წარმოდგენის ბოლო ვადაა 2023 წლის 5 ივლისი.