თუ მომავალზე ზრუნვა და წახალისება გინდათ, გეტყვით რა გააკეთოთ - ინ ვიტრო განაყოფიერებისთვის სახელმწიფომ დაფინანსება გამოყოს და ეს იქნება სწორედ წახალისება, - ასე მიმართა პრემიერ-მინისტრ ირაკლი ღარიბაშვილს პარლამენტის წევრმა ნატო ჩხეიძემ.

როგორც ჩხეიძემ პარლამენტის პლენარულ სხდომაზე განაცხადა, ერთი თვის წინ კლინიკებს უფლება მისცეს, რომ საერთაშორისო სუროგაცია-დონაციის უფლება ჰქონოდათ და ერთი თვის მერე იგებენ, რომ ეს შეიძლება შეწყდეს.

“გასაგებია, რომ სუროგაცია ცოტა პრობლემატურია, რადგან ქალები ემიგრაციაში თავქუდმოგლეჯილი გარბიან, რათა აქ ოჯახები არჩინონ. თქვენ ბრძანეთ, რომ სამაგიეროდ ეს ყველაფერი ქართველებს ექნებათ და გვინდა წავახალისოთო. წახალისებაზე კი არაფერი გითქვამთ და გეტყვით, რა უნდა გააკეთოთ წასახალისებლად - თუნდაც ის, რომ ინ ვიტრო განაყოფიერებისთვის სახელმწიფომ დაფინანსება გამოყოს. ეს იქნება სწორედ წახალისება. ისეთი არაფერი არ არის - მაქსიმუმ 5 ათასი ლარია. ეს იქნება წახალისება და ჩვენს მომავალზე ზრუნვა“, - განაცხადა ნატო ჩხეიძემ.