თინა ბოკუჩავა - ხელისუფლების მხრიდან უარი დებატებზე მეტყველებს იმაზე, რომ სააკაშვილის ეშინიათ
წარმოუდგენელია "რუსული ოცნების" წარმომადგენელთა კომენტარები, რომლებიც პუტინის ერთ -ერთ მთავარ მტერს მიზანმიმართულად კლავენ საპყრობილეში, ეს დღევანდელმა კადრებმა კიდევ ერთხელ დაადასტურა , - ამის შესახებ საპარლამენტო ფრაქციის, " ნაციონალური მოძრაობის" თავმჯდომარე თინა ბოკუჩავამ საქართველოს მესამე პრეზიდენტ, მიხეილ სააკაშვილთან დაკავშირებით განაცხადა.
როგორც მან აღნიშნა, ხელისუფლებას მიხეილ სააკაშვილის ეშინია და ამიტომ ამბობს უარს მასთან ევროპარლამენტარების შეშვებაზე.
“პრეზიდენტ სააკაშვილის ამ მდგომარეობაში ხილვა დარწმუნებული ვარ, უმძიმესია ნებისმიერი მოქალაქისთვის, მიუხედავად მათი პოლიტიკური გემოვნებისა, ვისაც იოტისოდენა შინაგანი მორალი და თუნდაც ჰუმანურობა და ადამიანობა გააჩნია. წარმოუდგენელია, მათ შორის კომენტარები, რომელსაც ამ დრომდე, აკეთებდნენ და აკეთებენ "რუსული ოცნების" წარმომადგენლები, რომლებიც ვლადიმერ პუტინის ერთ- ერთ მთავარ მტერს მიზანმიმართულად კლავენ საპყრობილეში, რაც დღევანდელმა კადრებმა კიდევ ერთხელ დაადასტურა.
მისი სურვილი, რომ ასეთი მძიმე ჯანმრთელობის მიუხედავად დებატებში შევიდეს დღევანდელ ხელისუფალთან, კიდევ ერთხელ მეტყველებს იმაზე, რომ მზად არის საკუთარი ჯანმრთელობა და სიცოცხლე დადოს სასწორზე და იბრძოლოს ჩვენი ქვეყნის უკეთესი მომავლისთვის, ხოლო ხელისუფლების მხრიდან უარი, იქნება ეს დებატებზე, თუ უარი ევროპარლამენტარებს, რომ შევიდნენ სააკაშვილთან და ღია კომუნიკაციაში იყვნენ, მეტყველებს იმაზე, რომ მათ სააკაშვილის ეშინიათ და იციან, თანაბარ გარემოში, სადაც არსებობს თანაბარი პოლიტიკური კონკურენციის შესაძლებლობა, მასთან დამარცხდებიან. მიუხედავად მათი მცდელობისა, რომ ტოტალურ იზოლაციაში ამყოფონ სააკაშვილი, რუსული ოცნების პოლიტიკურ მარცხი, რომელიც ქვეყნის რუსიფიკაციას ცდილობს, გარდაუვალია", - განაცხადა ბოკუჩავამ.
v-if="article.gallery" v-html="article.gallery"
