რუსთავში ძველი ლიფტების ახლით ჩანაცვლების პროექტის მეორე ეტაპის სამუშაოები მიმდინარეობს. ამის შესახებ ინფორმაციას რუსთავის მერია ავრცელებს.

მათივე ცნობით, რუსთავში, ძველი ლიფტების ახლით ჩანაცვლების პროექტის მეორე ეტაპის სამუშაოები მიმდინარეობს და 2023 წლის ბოლომდე, მაღალსართულიან საცხოვრებელ კორპუსებში, კიდევ 100 ახალი ლიფტი დამონტაჟდება.

როგორც ინფორმაციაშია აღნიშნული, პროექტი, რუსთავის მერმა ნინო ლაცაბიძემ მოსახლეობას წლის დასაწყისში, ქალაქის ახალი განვითარების გეგმასთან ერთად წარუდგინა. ძველი ლიფტების ახლით ჩანაცვლების პროცესი დღეისათვის ქალაქის რამდენიმე უბანში ერთდროულად მიმდინარეობს.

ნინო ლაცაბიძე, სამუშაოების მიმდინარეობას ინფრასტრუქტურის სამსახურის, „რუსთავის კორპუსისა“ და საკრებულოს ფრაქცია “ქართული ოცნების“ წევრებთან ერთად გაეცნო.

“რუსთავში 2022-2023 წლებში ლიფტების მოვლა-პატრონობაზე და რეაბილიტაციაზე 12 მილიონი ლარია გათვალისწინებული. ჩვენ ვაგრძელებთ ძველი ლიფტების ახალი, უსაფრთხო და თანამედროვე ლიფტებით ჩანაცვლების პროცესს. ლიფტების სამონტაჟო სამუშაოები ახლაც რამდენიმე მისამართზე ერთდროულად მიმდინარეობს“, - განაცხადა ნინო ლაცაბიძემ.

ასევე, ინფორმაციაში აღნიშნულია, რომ 2022 წლის განმავლობაში, საცხოვრებელ კორპუსებში, პროექტ -,,განახლებული რეგიონებისა" და რუსთავის მერიის პროგრამის ფარგლებში, 126 ახალი ლიფტი დამონტაჟდა. 2023 წლის ბოლომდე, კი ძველი ლიფტი ახლით, კიდევ 100 მისამართზე შეიცვლება. 2022 - 2023 წლებში, ახალი ლიფტების შეძენა-მონტაჟისა და მოვლა-პატრონობისთვის, რუსთავისა და ცენტრალური ბიუჯეტიდან 12 მილიონი ლარი იყო გათვალისწინებული.