დღეს, როდესაც ზელენსკის სიტყვას დიდი ფასი აქვს, განსაკუთრებით მნიშვნელოვანია, საქართველომაც ერთხელ მაინც დაუგდოს ყური ამ ადეკვატურ მოთხოვნას - თუ ახლა არ გაუშვებენ, მაინც დარწმუნებული ვარ, რომ თავისივე ხელით მოუწევთ მიხეილ სააკაშვილის გათავისუფლება, რაც არ უნდა იქადნოს ირაკლი კობახიძემ , - ამის შესახებ „სტრატეგია აღმაშენებლის“ თავმჯდომარე გიორგი ვაშაძემ განაცხადა, რითაც გამოეხმაურა უკრაინიდან საქართველოს ელჩის დაბრუნების გადაწყვეტილებას და კონსულტაციებზე ხელისუფლების უარს.

მისივე თქმით, „ქართული ოცნება“ დასავლელ პარტნიორებთან მძევლებით საუბარს მიეჩვია.

„მიხეილ სააკაშვილი პოლიტიკური პატიმარია და სწორედ ამას ამბობს უკრაინის პრეზიდენტი, რომ მოხდეს მისი გათავისუფლება საპატიმრო დაწესებულებიდან - სამკურნალოდ იქნება, ისე გაუშვებენ თუ ასე, მთავარი ისაა, რომ ეს საკითხი გადასაწყვეტია. დღეს, როდესაც უკრაინას უსმენს მთელი მსოფლიო და ზელენსკის სიტყვას დიდი ფასი აქვს, განსაკუთრებით მნიშვნელოვანია, საქართველომაც ერთხელ მაინც დაუგდოს ყური ამ ადეკვატურ მოთხოვნას. საერთოდ, „ქართული ოცნება“ მიეჩვია მძევლებით საუბარს დასავლელ პარტნიორებთან - ნიკა გვარამია ახლა გამოუშვეს; 8 მარტს 3 პოლიტიკური მძევალი ჰყავდათ; 19 აპრილისთვის 2 მძევალი და ა.შ. მაგრამ მიხეილ სააკაშვილი მხოლოდ მათი მძევალი არ არის, პუტინის მძევალია და პრინციპულია, რომ ეს ადამიანი თავისუფალი იყოს. იმიტომ, რომ ის საქართველოს განვითარებას უკავშირდება და აუცილებელია, რომ ადამიანი, რომელიც რუსეთთან წინააღმდეგობის ერთ-ერთი სიმბოლოა, საპატიმრო დაწესებულებაში არ იჯდეს, მითუმეტეს ასეთ მძიმე მდგომარეობაში არ იყოს. თუ ახლა არ გაუშვებენ, მაინც დარწმუნებული ვარ, რომ თავისივე ხელით მოუწევთ მიხეილ სააკაშვილის გათავისუფლება, რაც არ უნდა იქადნოს ირაკლი კობახიძემ“,- განაცხადა ვაშაძემ.

ცნობისთვის, ვოლოდიმირ ზელენსკის დავალებით, უკრაინის საგარეო უწყება საქართველოს ელჩს 48 საათის განმავლობაში კიევის დატოვებას და მიხეილ სააკაშვილის საკითხზე კონსულტაციებისთვის თბილისში დაბრუნებას სთავაზობს. შეგახსენებთ იმასაც, რომ როგორც „ქართული ოცნების“ თავმჯდომარე ირაკლი კობახიძემ განაცხადა, სააკაშვილის საკითხთან დაკავშირებით კონსულტაციები „აბსოლუტურად გამორიცხულია“.