ეს ქვეყანა გადასარჩენია რუსი ოლიგარქისგან, რუსული მმართველობისგან და რუსული კლანჭებისგან - „რუსული ოცნება“ ისევ გააგრძელებს ანტისაოკუპაციო სიმბოლიკიანი მაისურების და ადამიანების დევნას,- ამის შესახებ „ნაციონალური მოძრაობის“ ახალგაზრდული ორგანიზაციის მდივანმა, იგორ ნარმანიამ ბრიფინგზე განაცხადა.

აღნიშნულით ის, გუშინ ბათუმში მომხდარ ფაქტს გამოეხმაურა, როდესაც მათივე ინფორმაციით, ერას მოედანზე, პარტია „ერთიანი ნაციონალური მოძრაობის“ წევრი ანტისაოკუპაციო მაისურით არ შეუშვეს.

„ის, რაც გუშინ, „ბათუმი არენაზე“ ვიხილეთ, კიდევ ერთხელ ცხადყოფს „რუსული ოცნების“ რუსული პოლიტიკის გაგრძელებას. მოვუწოდებ ახალგაზრდებს, ჩვენს თანატოლებს, რომ ახლა არის ყველაზე მეტად ეროვნული კამპანიის, ეროვნული ერთიანობის დრო, რადგან „რუსულმა ოცნებამ“ ვერ შეძლოს ჩვენი გარუსება.

თხოვნით მივმართავ ახალგაზრდებს, შემდეგ მატჩებზე იქნება, თუ საზოგადოებრივი თავშეყრის ადგილებზე, აუცილებლად ვიმოძრაოთ ანტისაოკუპაციო სიმბოლიკიანი მაისურებით, თუ ნივთებით, არ დავემორჩილოთ იმას, რასაც „რუსული ოცნება“ აწარმოებს და არქმევს ვითომ არგაღიზიანების პოლიტიკას.

ეს ქვეყანა გადასარჩენია რუსი ოლიგარქისგან, რუსული მმართველობისგან და რუსული კლანჭებისგან. ის, რაც ბათუმის ქუჩებში ვიხილეთ, ნებისმიერ ადგილზე იქნება, „რუსული ოცნება“ ისევ გააგრძელებს ანტისაოკუპაციო სიმბოლიკიანი მაისურების და ადამიანების დევნას“, - აღნიშნა იგორ ნარმანიამ.