სს ,,ენერგო-პრო ჯორჯია“ სემეკის გადაწყვეტილებას კომპანიის დაჯარიმების შესახებ სასამართლოში გაასაჩივრებს.
ამის შესახებ ინფორმაციას „ენერგო-პრო ჯორჯია“ ავრცელებს.
როგორც კომპანიაში აცხადებენ, გადაწყვეტილება არასწორი და მიუღებელია, შესაბამისად, ის სასამართლოში გასაჩივრდება.
„დარწმუნებული ვართ, სასამართლო ობიექტურად განიხილავს დავას და გამოიტანს სამართლიან გადაწყვეტილებას, გაუქმდება დაკისრებული ჯარიმა“, - აცხადებენ სს „ენერგო-პრო ჯორჯიაში“.
ცნობისთვის, საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ (სემეკ) სს „თელასი“ და სს „ენერგო-პრო ჯორჯია“, ელექტროენერგიით მომარაგების საიმედოობის მაჩვენებლების გაუარესებისა და აღნიშნულთან დაკავშირებით სემეკის ელექტრონულ ჟურნალში არასრულყოფილი ინფორმაციის დაფიქსირების გამო, 75 000-75 000 ლარით დააჯარიმა.
სემეკის მიერ გავრცელებული ინფორმაციით, კომპანიებს დაევალათ დაკისრებული ჯარიმების გადახდა სახელმწიფო ბიუჯეტში.
