„გაზის ტრანსპორტირების კომპანია“ - ზუგდიდის, ხობის, წალენჯიხის და ანაკლიის გაზგამანაწილებელი სადგურის მომხმარებლებს გაზის მიწოდება დროებით შეეზღუდებათ
დასავლეთ საქართველოში მოსული უხვი ნალექის გამო ადიდებულმა მდინარე ხობისწყალმა ქუთაისი-სოხუმის DN500მმ მაგისტრალური გაზსადენი დააზიანა.
ამის შესახებ ინფორმაციას „გაზის ტრანსპორტირების კომპანია“ ავრცელებს.
მათი ცნობით, დაზიანების გამო, 11 ივლისის 07:50 საათიდან ბუნებრივი გაზის მიწოდება სრულად შეუწყდა ზუგდიდის, ხობისა და წალენჯიხის მუნიციპალიტეტებს, ასევე ანაკლიის გაზგამანაწილებელი სადგურის მომხმარებლებს.
„შპს „საქართველოს გაზის ტრანსპორტირების კომპანიის“ ტექნიკური ჯგუფები ყველაფერს აკეთებენ იმისათვის, რომ საავარიო მდგომარეობიდან გამომდინარე, პრობლემა დროულად აღმოიფხვრას და კონკრეტულ მონაკვეთზე გაზსადენთა სისტემის გამართულად ფუნქციონირება აღდგეს“, - ნათქვამია გავრცელებულ ინფორმაციაში.
