ბათუმის ავტოტრანსპორტში ქალი მძღოლი დასაქმდა. დღეს ბათუმის მერი არჩილ ჩიქოვანი და აჭარის მთავრობის ადმინისტრაციის უფროსი თინათინ ზოიძე გერმანიის საერთაშორისო თანამშრომლობის საზოგადოების (GIZ) მხარდაჭერით გადამზადებულ ავტობუსის მძღოლებს შეხვდნენ და ახლად დასაქმებულ ქალ მძღოლს საპასუხისმგებლო საქმიანობაში წარმატებები უსურვეს. ამის შესახებ ინფორმაციას ბათუმის მერია ავრცელებს.

ბათუმის მერის არჩილ ჩიქოვანის განცხადებით, ბათუმის მუნიციპალურ სატრანსპორტო კომპანიაში ქალი მძღოლი დასაქმდა, რომელიც მდგრადი ურბანული მობილობის პროგრამის ფარგლებში, გერმანიის საერთაშორისო თანამშრომლობის საზოგადოების მხარდაჭერით გადამზადდა.

„ჩვენს ახალ თანამშრომელს შესაძლებლობა ექნება, მოემსახუროს ქალაქის მოსახლეობას ახალი ტრანსპორტით. აღსანიშნავია, რომ წელს მუნიციპალური ავტოპარკი სრულად განვაახლეთ. ვიმედოვნებ, ქალი მძღოლის დასაქმების პრეცედენტი სხვა ქალბატონებისთვისაც იქნება მამოტივირებელი. მუნიციპალურ სატრანსპორტო კომპანიას კი ვუსურვებ, ამ საპასუხისმგებლო სამსახურში, მეტი ქალი მძღოლის დასაქმებას", - განაცხადა არჩილ ჩიქოვანმა.