პარტიების გაერთიანებას შეიძლება ორი ამოცანა ჰქონდეს - ერთი მორალური ნაწილი და ზოგადი საკითხები ან მეორე, კონკრეტული ამოცანა - დღეს ეს შეიძლება ივანიშვილის ხელისუფლების დამარცხება იყოს, - ასე ეხმაურება პარტია „ევროპული საქართველოს“ გენერალური მდივანი, აკაკი ბობოხიძე „სტრატეგია აღმაშენებლისა“ და „ნაციონალური მოძრაობის“ გაერთიანებას.

როგორც ბობოხიძე აცხადებს, სამწუხაროდ, „ნაციონალური მოძრაობა“ ამ ორი ამოცანიდან, ვერცერთს აკმაყოფილებს.

„მასთან ღირებულებით ნაწილში გაერთიანება წარმოუდგენელია, ასევე შეუძლებელია ივანიშვილის დამარცხება „ნაციონალური მოძრაობის“ სახელით და მის ქუდქვეშ. ამიტომ ჩვენ, „ევროპული საქართველო“ ვცდილობთ ის ადამიანები ვიპოვოთ, რომლებიც ღირებულებით ჩვენთან ძალიან ახლოს არიან და გავზარდოთ ამომრჩევლის რაოდენობა. ეს ყველაფერი საბოლოოდ, მოემსახურება მეორე ამოცანასაც. ნებისმიერი ამომრჩეველი, რომელიც „ევროპულ საქართველოს“ მიცემს ხმას, ბიძინა ივანიშვილთან და „ნაციონალურ მოძრაობასთან“ ვერაფრით ვერ იქნება”, - განაცხადა აკაკი ბობოხიძემ, რომლის კომენტარსაც “ევროპული საქართველო“ ავრცელებს.