ბათუმის პორტის მიმდებარე ტერიტორიაზე სამართალდამცავები იმყოფებიან. ადგილზე შეკრებილები არიან მოქალაქეები.

ტერიტორიაზე იმყოფება "ერთიანი ნაციონალური მოძრაობის" თავმჯდომარე ლევან ხაბეიშვილი. ისინი ბათუმის პორტში სოჭიდან საკრუიზო ლაინერის შემოსვლას აპროტესტებენ.

პარტიის წევრებსა და პოლიციას შორის ხმაურია.

"ნაციონალური მოძრაობის" წევრების ინფორმაციით, ადგილზე სამართალდამცველებმა გზა გადაკეტეს და ტერიტორია ბარიკადებით შემოსაზღვრეს.

ბათუმის პორტის მიმდებარე ტერიტორიაზე საპროტესტო აქცია 31 ივლისს, დილის 06:00 საათზე დაანონსდა. პროტესტი მას შემდეგ დაიგეგმა, რაც გავრცელდა ცნობები, რომ საკრუიზო ლაინერი Astoria Grande სოჭიდან ბათუმში 31 ივლისს ჩავა. “ეხო კავკაზას“ ინფორმაციით, საკრუიზო ლაინერზე რუსეთის პრეზიდენტის ვლადიმერ პუტინისა და ომის მომხრე არტისტები იმყოფებიან.

შეგახსენებთ, რომ საკრუიზო ლაინერი Astoria Grande პირველად საქართველოში 27 ივლისს შემოვიდა. ბათუმის პორტში მოქალაქეებმა საკრუიზო გემის ჩამოსვლა, მაშინაც გააპროტესტეს და გემმა პორტი ხმაურის და პროტესტის ფონზე დატოვა.