ბათუმის პორტის მიმდებარედ, სადაც მოქალაქეები სოჭიდან საკრუიზო ლანიერის შემოსვლას აპროტესტებენ, სამართალდამცველთა განსაკუთრებული მობილიზებაა.

ტერიტორიაზე პოლიციის დამატებითი შემადგნელობის მობილიზება მოხდა. გარკვეული პერიმეტრზე პოლიციას ტერიტორია ჯებირებით აქვს შემოსაზღვრული.

ადგილზე კვლავ რჩებიან აქციის მონაწილეები. აქციაზე ამ დროისთვის სიმშვიდეა.

"იქნება პროტესტი, აუცილებლად. თითოეულ მოქალაქეს, ვისაც შეუძლია აპროტესტებს და უნდა იცოდნენ პუტინისტებმა, რომ აქ ვარდებით არავინ დახვდება. ანწუხელიძის მკვლელებს ია-ვარდით ვერ დახვდებიან. ჩვენი ქვეყნის ტერიტორიები რომ ოკუპირებულია, ვერ დახვდებიან აქ ია-ვარდით. უკრაინაში რომ ტერორიზმს ჩადის პუტინი, ვერ დახვდებიან იმ ხალხს", - განაცხადა "ნაციონალური მოძრაობის" თავმჯდომარემ, ლევან ხაბეიშვილმა.

ბათუმის პორტის მიმდებარედ, მოქალაქეები მას შემდეგ შეიკრიბნენ, რაც გავრცელდა ინფორმაცია, რომ ადგილზე სამართალდამცველებმა ბარიკადები აღმართეს და ტერიტორია შემოსაზღვრეს.

მანამდე ბათუმის პორტის მიმდებარე ტერიტორიაზე საპროტესტო აქცია 31 ივლისს, დილის 06:00 საათისთვის იყო დაანონსებული. პროტესტი მას შემდეგ დაიგეგმა, რაც გავრცელდა ცნობები, რომ საკრუიზო ლაინერი Astoria Grande სოჭიდან ბათუმში 31 ივლისს ჩავა. “ეხო კავკაზას“ ინფორმაციით, საკრუიზო ლაინერზე რუსეთის პრეზიდენტის ვლადიმერ პუტინისა და ომის მომხრე არტისტები იმყოფებიან.

შეგახსენებთ, რომ საკრუიზო ლაინერი Astoria Grande პირველად საქართველოში 27 ივლისს შემოვიდა. ბათუმის პორტში მოქალაქეებმა საკრუიზო გემის ჩამოსვლა, მაშინაც გააპროტესტეს და გემმა პორტი ხმაურის და პროტესტის ფონზე დატოვა.