სოჭიდან წამოსული საკრუიზო გემის ბათუმში შესვლას ქუთაისშიც აპროტესტებენ.

მოქალაქეები ქალაქის ცენტრალური მოედანზე ამ წუთებში იკრიბებიან.

აქციის მონაწილეები რუსული საკრუიზო გემის ზღვისპირა რეგიონში შესვლას გმობენ და დაკავებულებს სოლიდარობას უცხადებენ.

ქალაქის ცენტრში შეკრებილი სხვადასხვა პროფესიის ადამიანი მოითხოვს, რომ პროტესტის გამო დაკავებული პირები დაუყოვნებლივ გათავისუფლდნენ.

"ვაპროტესტებთ რუსული ხომალდის ბათუმში შემოსვლას, რასაც მოჰყვა აქტივისტების დაკავება. მათ შორის ერთი არის ქუთაისელი. დაკავებულები არიან ნაცემი, მათ სასტიკად უსწორდებოდნენ და მათი ადგილმდებარეობა იყო უცნობი. მოვითხოვთ, დაუყოვნებლივ გათავისუფლდნენ ეს ადამიანები. მსგავსი პროტესტი უნდა იყოს ყველა ქალაქში" , - განაცხადეს აქციის მონაწილეებმა.