მთავრობის ადმინისტრაციის რეგიონებთან ურთიერთობის დეპარტამენტის უფროსის განცხადებით, ლერი ბარნაბიშვილის განცხადებით, შოვში სტიქიის შედეგად დაღუპული 11 ადამიანიდან 6 იდენტიფიცირებულია.

როგორც ბარნაბიშვილმა ჟურნალისტებს განუცხადა, სამძებრო-სამაშველო ღონისძიებები მაქსიმალური სიფრთხილით, ტექნიკითა და ცოცხალი ძალის მონაწილეობით მიმდინარეობს.

„მძიმე ტექნიკა მუშაობს სამაშველო სამსახურის ქვეითებთან ერთად, ვინაიდან, ჩვენ სამძებრო სამუშაოებს ვახორციელებთ იმ დათქმით, რომ უნდა ვიპოვოთ ცოცხალი ადამიანები და სამწუხაროდ, შესაძლოა, იყოს გვამებიც. ამიტომ სამუშაოები მიმდინარეობს ფრთხილად, ცოცხალი ძალის თანდასწრებით მძიმე ტექნიკასთან ერთად.

რაც შეეხება მიცვალებულებს, ამ ეტაპზე, 11-დან, როგორც ვიცი, ამოცნობილია ექვსი პიროვნება“,- განაცხადა ლერი ბარნაბიშვილმა.

ცნობისთვის, შოვში, მეწყერი 3 აგვისტოს ჩამოწვა. სტიქიის ზონიდან, ამ დროისთვის, 210 ადამიანია გამოყვანილი, გარდაცვლილია 11 პირი.