პარლამენტის თავმჯდომარის შალვა პაპუაშვილის განცხადებით, 2008 წლის აგვისტოს ომის თაობაზე რეზოლუციაში, რომელსაც „ნაციონალურმა მოძრაობამ“ დაუჭირა მხარი, წერია, რომ 7 აგვისტოს ქართულმა მხარემ დაიწყო შეიარაღებული კონფლიქტის ახალი ფაზა.

როგორც შალვა პაპუაშვილმა ჟურნალისტებს განუცხადა, ამით მათ მხარი დაუჭირეს ქართული მხარის დადანაშაულებას ომის განახლებაში.

„უპირველეს ყოვლისა, ამ რეზოლუციაში, რომელსაც მაშინ მხარი დაუჭირა ევროსაბჭოში „ნაციონალურმა მოძრაობამ“ წერია, რომ 2008 წლის 7 აგვისტოს ქართულმა მხარემ დაიწყო შეიარაღებული კონფლიქტის ახალი ფაზა. ამით მათ მხარი დაუჭირეს ქართული მხარის დადანაშაულებას ომის განახლებაში. ამიტომაც საზოგადოებისთვის დიდი ხნის განმავლობაში დამალული იყო, თუმცა ესეც გაირკვა და ყველამ კარგად იცის. რაც შეეხება მტკიცებას, იყო ამ ჩანაწერის ინიციატორი რუსეთი თუ სხვა, მით უფრო უარესი, თუკი ეს რუსეთი არ იყო და აღმოჩნდება, რომ თავად „ნაციონალური მოძრაობა“ იყო ჩართული ამ პროექტის შედგენაში და ისინი იყვნენ ამ ჩანაწერის ინიციატორები. ამიტომ, მათ უნდა გასცენ პასუხი, ვინ იყო ამ ჩანაწერის ინიციატორი. მხარდაჭერას რაც შეეხება, კიდევ ერთხელ ხაზი უნდა გაესვას, რომ „ნაციონალური მოძრაობა“ ცდილობდა საკუთარი მხარდაჭერა გაემართლებინა იმით, თითქოს სხვა კარგი ჩანაწერები რაც არსებობს, ამის გამო რეზოლუცია ჩავარდებოდა, რაც არის ტყუილი. უმრავლესობა საკმარისი იყო ამ რეზოლუციის მხარდაჭერისთვის, მაგრამ ქართულ სახელმწიფოს და მის წარმომადგენლებს ხელი არ უნდა გაესვარათ ასეთი ჩანაწერის მხარდაჭერაში“, - განაცხადა პაპუაშვილმა.