ჟიგიმანტას პავილიონისი - საქართველო უდიდესი დასავლური დაშოშმინების პოლიტიკის, უხერხემლობის შედეგია - ის, რაც  ბუქარესტიდან ვილნიუსამდე გავაკეთეთ, სირცხვილია, ჩვენ უბრალოდ დავაშოშმინეთ რუსეთი

ვფიქრობდი, რატომ დააფუძნა სენატორმა მაკკეინმა ეს კონფერენცია საქართველოში, რადგან ყოველ წელს ჩვენ გვაქვს დაპირისპირება საკუთარ სინდისთან. იმიტომ, რომ საქართველო უდიდესი დასავლური დაშოშმინების პოლიტიკის, უხერხემლობის შედეგია - ბოროტისა და ეშმაკის გულში ჩაკვრა მას შემდეგ, რაც საქართველოში ჩაიდინეს, - ამის შესახებ ლიეტუვის პარლამენტის წევრმა, ჟიგიმანტას პავილიონისმა თბილისში მიმდინარე საერთაშორისო კონფერენციაზე - „პუტინიზმის დამარცხება!" - განაცხადა.

მისი თქმით, ბუქარესტის სამიტზე რომ ამერიკელებისა და ლიეტუველების აზრი გაეთვალისწინებინათ, ახლა არც საქართველო და არც უკრაინა ოკუპირებული არ იქნებოდნენ.

„არანაირი ოკუპაცია საქართველოში, არანაირი ოკუპაცია უკრაინაში, არანაირი მოლაპარაკება, მაგრამ ეს მომავალი უარყვეს. ასე რომ, ძალიან უხეში ვიქნები და ვიტყვი: თუ ჩვენ გავაგრძელებთ ამ სტრატეგიას, სტრატეგიის არ ქონის სტრატეგიას, თუ გავაგრძელებთ ამ რუსეთის მიმართ დაშოშმინების პოლიტიკას, სჯობს, არ ვიზეიმოთ ნატო-ს მომავალი ვაშინგტონში ნატო-ს სამიტზე, რადგან ეს იქნება მხოლოდ წარსულის ზეიმი და ამ წარსულში მე ვერ ვხედავ ბევრ ნათელ წერტილს, სიმართლე გითხრათ, რადგან ის, რაც ჩვენ გავაკეთეთ ბუქარესტიდან ვილნიუსამდე, სირცხვილია. სირცხვილია, რადგან იმის ნაცვლად, რომ შეგვექმნა ევროპა მთლიანი და თავისუფალი, იმის ნაცვლად, რომ გვებრძოლა ჩვენს კონსტიტუციებში, ნატო-ს ხელშეკრულებაში ჩაწერილი ღირებულებებისთვის, ჩვენ უბრალოდ დავაშოშმინეთ რუსეთი“, - აღნიშნა ჟიგიმანტას პავილიონისმა.