მე არ მგონია, რომ ეს იმპიჩმენტი დასრულდეს იმპიჩმენტით - ყველაფერი არის "ოცნების" შოუ, რომელიც წაგვაღებინებს თვეს, თვე ნახევარს და გვალაპარაკებს ამ თემაზე, სხვა შედეგი არ ექნება, - ამის შესახებ "გირჩი-მეტი თავისუფლებისთვის" ლიდერმა ზურაბ ჯაფარიძემ განაცხადა.

როგორც მან აღნიშნა, ერთადერთი, რაც სალომე ზურაბიშვილს პროცესის წინ წასაწევად შეუძლია, არის საქართველოს მე-3 პრეზიდენტის შეწყალება.

„მე არ მგონია, რომ ეს იმპიჩმენტი დასრულდეს იმპიჩმენტით. ეს იქნება პროცესი, რომელიც წამოიწყო "ოცნებამ" მხოლოდ და მხოლოდ იმისთვის, რომ ერთი თვის განმავლობაში ყურადღება გადაიტანოს სხვა მნიშვნელოვანი თემებიდან და გვალაპარაკოს ამ თემაზე. მეტი ამას არანაირი შედეგი არ ექნება. მე არც იმის მჯერა, რომ სალომე ზურაბიშვილს რაიმე ბერკეტი გააჩნია, რომ ჩავიდეს ევროკავშირის ქვეყნების დედაქალაქებში და იქ მოლაპარაკებებით რაიმე შედეგი დადოს, თუნდაც სტატუსთან მიმართებით, იმიტომ, რომ მასზე არაა დამოკიდებული. მათაც იციან, რომ მასზე არაა დამოკიდებული. რეფორმები არის გასატარებელი და ამ რეფორმებთან მიმართებით სალომე ზურაბიშვილს არც რაიმე ბერკეტი გააჩნია. ერთადერთი რაც შეუძლია არის ის, რომ სააკაშვილი გამოუშვას და ამით შეუძლია წვლილი შეიტანოს. ამიტომ, საბოლოო ჯამში, ყველაფერი არის "ოცნების" შოუ, რომელიც წაგვაღებინებს თვეს, თვე ნახევარს და გვალაპარაკებს ამ თემაზე, სხვა შედეგი არ ექნება",- განაცხადა ზურა ჯაფარიძემ.