რაც შეეხება, ოპოზიციის მიერ ინიცირებულ კანონპროექტებს - თქვენ ალბათ გაეცანით, მიმდინარე კვირის დღის წესრიგს - ხუთი კანონპროექტი გვაქვს განსახილველი, აქედან სამი კანონპროექტი არის ოპოზიციის მიერ ინიცირებული, - ასე მიმართა საშემოდგომო სესიის პლენარულ სხდომაზე საქართველოს პარლამენტის თავმჯდომარემ შალვა პაპუაშვილმა პარლამენტის წევრ რომან გოცირიძეს, რომელიც საქართველოს პარლამენტი ოპოზიციის მიერ ინიცირებული კანონპროექტების განხილვის უგულებელყოფაში დაადანაშაულა.

როგორც პარლამენტის თავმჯდომარემ რომან გოცირიძეს განუმარტა, დღის წესრიგში წარმოდგენილი ხუთი საკითხიდან სამი ოპოზიციის მიერ არის ინიცირებული.

„ბატონო რომან, ორ კანონპროექტზე ბატონი გიორგი ვაშაძეა მომხსენებელი და ერთზე, ქალბატონი თეონა აქუბარდია და ბატონი არმაზ ახვლედიანი. ასე რომ, რაც მოსულია, დღის წესრიგშია. ეს არის და იმედია, ამ ორ კანონპროექტსაც გამოიტანენ განსახილველად“, - განაცხადა შალვა პაპუაშვილმა.

„ევროოპტიმისტების“ დეპუტატმა, რომან გოცირიძემ საპარლამენტო უმრავლესობის დეპუტატებს პარლამენტის პლენარულ სხდომაზე სიტყვით გამოსვლისას მისი პოლიტიკური ჯგუფის მიერ ინიცირებულ კანონპროექტებთან დაკავშირებით მიმართა და მოუწოდა, „შეწყვიტონ საკითხების ხელოვნურად შეჩერება და საზოგადოების თვალწინ მისი განხილვის დაბლოკვა“.