ქობულეთში, უხვი ნალექის შედეგად რამდენიმე ადგილზე განვითარდა მეწყრული პროცესი, ძლიერი წვიმის შედეგად მდინარე აჭყვა კალაპოტიდან გადმოვიდა, რამაც რამდენიმე მისამართზე დატბორვა გამოიწვია. ამის შესახებ ინფორმაციას აჭარის მთავრობა ავრცელებს.
მათივე ცნობით, უხვი ნალექის შედეგად განსაკუთრებით დაზიანდა რამდენიმე ოჯახი, მათ შორის სოფელ ქობულეთში მცხოვრები მინდია ჯაფარიძის და სოფელ ზენითში მცხოვრები იმედო ქათამაძის ოჯახი. ორივე ოჯახი გადაყვანილია უსაფრთხო ადგილზე. აჭარის მთავრობის თავმჯდომარის, თორნიკე რიჟვაძის სარეზერვო ფონდი ქობულეთში, სტიქიის შედეგად დაზარალებულ ოჯახებს მატერიალურ დახმარებას გაუწევს.
ამასთან, დასკვნით ეტაპზეა გზების გაწმენდითი სამუშაოები და გადაადგილება ყველა მიმართულებით შეფერხების გარეშეა შესაძლებელი. განხორციელდა დატბორილი ადგილების ამოტუმბვა.