მარნეულის მერია - მუნიციპალიტეტში მცხოვრებ 300-მდე ბავშვს სასკოლო ჩანთები და სასწავლო-საკანცელარიო ნივთები დაურიგდა
მარნეულის მუნიციპალიტეტის ადგილობრივი თვითმმართველობის გადაწყვეტილებით, 2023 სასწავლო წლის დადგომასთან დაკავშირებით მუნიციპალიტეტში მცხოვრებ 300-მდე ბავშვს სასკოლო ჩანთები და სასწავლო/საკანცელარიო ნივთები დაურიგდათ, - ამის შესახებ ინფორმაციას მარნეულის მერია ავრცელებს.
უწყების ცნობით, მარნეულის მუნიციპალიტეტის მერმა კენან ომაროვმა და საკრებულოს თავმჯდომარე ამირან გიორგაძემ, მარნეულის საჯარო ბიბლიოთეკაში შეკრებილ მოსწავლეებს და მათ მშობლებს, სასწავლო წლის დაწყება მიულოცეს და საჩუქრები პირადად გადასცეს.
მათივე ინფორმაციით, შეხვედრას მარნეულის მუნიციპალიტეტის მერის პირველი მოადგილე როინ დეკანოიძე, მერის მოადგილე ზურაბ ფანგანი და ადგილობრივი თვითმმართველობის წარმომადგენლები ესწრებოდნენ.
მარნეულის მუნიციპალიტეტის თვითმმართველობამ სასკოლო ჩანთები და ნივთები სოციალურად შეჭირვებული მრავალშვილიანი ოჯახების სასკოლო ასაკის ბავშვებს, სსსმ და შშმ მოსწავლეებს გადასცა.
„ახალი სასწავლო წლის დაწყებას ვულოცავ ყველა მოსწავლეს და განსაკუთრებით პირველკლასელებს, რომლებიც წელს პირველად შეაღებენ სკოლის კარს.
დღეს, იმ მოსწავლეებს, რომლებიც ჩვენგან განსაკუთრებულ მხარდაჭერას საჭიროებენ, სასკოლო ნივთები და ჩანთები გადავეცით.
წარმატებულ სასწავლო წელს ვუსურვებ ყველა მოსწავლეს!“, - აცხადებს მარნეულის მუნიციპალიტეტის მერი კენან ომაროვი.
