ევროკავშირის და გაეროს განვითარების პროგრამის ხელშეწყობით გორში მშვიდობის საერთაშორისო დღესთან დაკავშირებით ღონისძიება გაიმართა

მშვიდობის საერთაშორისო დღეს, გორში ღონისძიება გაიმართა, რომელსაც შიდა ქართლის რეგიონში მცხოვრები დევნილები, კონფლიქტით დაზარალებული ქალები და ადმინისტრაციულ გამყოფ ხაზთან მდებარე სოფლების მოსახლეობა დაესწრო. ინფორმაციას გაეროს განვითარების პროგრამა ავრცელებს.

მათი ცნობით, ღონისძიების ორგანიზატორი ადგილობრივ ქალთა ორგანიზაცია "მშვიდობის კვლევის ცენტრი თბილისია”, ხოლო მხარდამჭერები ევროკავშირი (EU) და გაეროს განვითარების პროგრამა (UNDP), EU4Dialogue პროექტის ფარგლებში.

„მშვიდობის დღემ ხაზი გაუსვა კონსტრუქციული სამშვიდობო კომუნიკაციის მნიშვნელობას კონფლიქტით დაზარალებული თემებისთვის. ღონისძიების მონაწილეები ჩაერთნენ პრაქტიკულ სემინარში ვერბალური და არავერბალური კომუნიკაციის უნარების გასაღრმავებლად. ტანგოს საცეკვაო ელემენტების გამოყენებით, მათ უკეთ გაიაზრეს, თუ როგორ იგება ურთიერთსასარგებლო ურთიერთობა ადამიანებს შორის და რა გზით ხდება ემოციების მართვა და კონფლიქტის არიდება“, - აღნიშნულია ინფორმაციაში.

„მშვიდობის საერთაშორისო დღეს, ჩვენ ვდგავართ კონფლიქტით დაზარალებული ადამიანების გვერდით, რათა მათთან ერთად ავაშენოთ მშვიდობიანი მომავალი. მტკიცედ გვჯერა, რომ ღია და პატივისცემით სავსე კომუნიკაციას შეუძლია დაამსხვრიოს სტერეოტიპები, გააბათილოს ცრუ წარმოდგენები და ხელი შეუწყოს ადამიანებს შორის ურთიერთგაგების ჩამოყალიბებას“, - განაცხადა UNDP-ის მოქმედმა ხელმძღვანელმა საქართველოში ანნა ჩერნიშოვა.

„EU4Dialogue პროექტის ფარგლებში, ევროკავშირი და გაეროს განვითარების პროგრამა თანამშრომლობენ ოცზე მეტ ქართულ არასამთავრობო და სათემო ორგანიზაციასთან, რომლებიც ჩართულები არიან კონფლიქტით დაზარალებული მოსახლეობის დახმარებისა და სოციალური ერთობის მშენებლობის საქმეში. ამ თანამშრომლობის შედეგად, საქართველოს სხვადასხვა რეგიონში, არაერთი სამოქალაქო ინიციატივა ხორციელდება. მათ შორისაა სოფლად მცხოვრები მეწარმე ქალების ხელშეწყობა, ახალგაზრდული ჯგუფებისა და გარემოსდაცვითი აქტივისტების მხარდაჭერა და საზოგადოებრივი დიალოგი კონფლიქტის მშვიდობიანი გარდაქმნის, ადამიანის უფლებების დაცვისა და თანასწორობის მიღწევის შესახებ.

„EU4Dialogue: კონფლიქტის ტრანსფორმაციის მხარდაჭერა სამხრეთ კავკასიასა და მოლდოვას რესპუბლიკაში“ ევროკავშირისა და გაეროს განვითარების პროგრამის ერთობლივი ინიციატივაა, რომელიც კონფლიქტით დაზარალებული მოსახლეობის კეთილდღეობას ემსახურება და ხელს უწყობს ცხოვრების ხარისხის გაზრდას, საარსებო წყაროს შექმნას, გენდერული თანასწორობის მიღწევას, ახალგაზრდების ჩართულობასა და კონფლიქტის მშვიდობიან გარდაქმნას“,-აღნიშნულია ინფორმაციაში.

რობინ დანიგანი - ვცდილობთ თუ არა ქართველი ხალხის დასანქცირებას? ცალსახად არა! ჩვენ გვსურს საუკეთესო ამ ქვეყნისთვის და გვსურს, რომ ეს ქვეყანა წარმატებული იყოს
ქართული პრესის მიმოხილვა 17.06.2024
ესტონეთის ელჩი - თუ გვინდა ევროკავშირის წევრობა, უნდა ვითამაშოთ წესების მიხედვით - საქართველოს ხელისუფლება ამბობს, რომ უახლოვდება ევროკავშირს, მაგრამ მათი ქმედებები ამას არ ადასტურებს
„დაგროვებითი პენსიის შესახებ“ კანონში ცვლილებები შედის - რა სიახლეებს უნდა ელოდონ საპენსიო სქემის მონაწილეები
როგორ ვებრძოლოთ მოგზაურთა დიარეას
„სიმეტრია პარკი“ მთაწმინდის რაიონში კომერციული ფართის მშენებლობის დასრულებას აანონსებს
ISET-ის ფინანსების სამაგისტრო პროგრამამ CFA ინსტიტუტთან აფილირება მიიღო
„ბიზნეს ოსკარად“ წოდებული „ოქროს ბრენდის“ დაჯილდოებაზე PSP კვლავ N1 ფარმაცევტულ ბრენდად აღიარეს