პარლამენტის ოპოზიციონერი დეპუტატი, ხატია დეკანოიძე აცხადებს, რომ რუსეთის მოქალაქე, რომელსაც მისი ადევნების გამო შემაკავებელი ორდერი ჰქონდა გამოწერილი, დღეს საქართველოს პარლამენტის შენობაში დახვდა, რის შემდეგაც მან პოლიცია გამოიძახა.

როგორც დეკანოიძემ „ინტერპრესნიუსთან“ საუბრისას აღნიშნა, საქმის შესწავლა დაიწყო.

„ერთი თვის წინ პარლამენტთან მხვდებოდა ვიღაც ადამიანი, რომელიც საეჭვოდ იქცეოდა. რაღაცებს მეძახდა. ეს სამი დღე გრძელდებოდა. შემდეგ პოლიციას რომ გამოვუძახე, შემაკავებელი ორდერი გამოუწერეს. რუსეთის მოქალაქეა. ახლა ქვეყნიდან წასულა, მერე ჩამოვიდა ისევ. შიგნით, პარლამენტის შენობაში უშვებენ რუსეთის მოქალაქეს, რომელსაც საქართველოს პარლამენტის წევრის მიმართ შემაკავებელი ორდერი ჰქონდა გამოწერილი. რა ვთქვა არ ვიცი. ამ ქვეყანაში... რამე რომ შემასხას, თავში რომ ჩამარტყას, ან ვინმეს რაღაცა დაუშავოს... ვიცით ვინ არის საერთოდ?!

დღეს დამხვდა პარლამენტის შენობაში, შიგნით. იქვე პოლიციას გამოვუძახე. პოლიციამ გავარკვევთო და დაიწეს შესწავლა. მე შეხვედრაზე ვარ, მაგრამ იმედია, მეტყვიან რა უქნეს ამ კაცს. წესით უნდა დააკავონ, არ ვიცი“, - განაცხადა დეკანოიძემ.

ცნობისთვის, ოპოზიციონერმა დეპუტატმა, ხატია დეკანოიძემ მსგავსი ფაქტის შესახებ მიმდინარე წლის ივნისშიც განაცხადა. როგორც დეპუტატი აღნიშნავდა, მაშინ მას სამი დღის მანძილზე პარლამენტიდან გამოსვლისას რუსეთის მოქალაქე, გაურკვეველი პირი ხვდებოდა. მას პოლიციამ შემაკავებელი ორდერი გამოუწერა.

"მე არასდროს არ მინახავს ეს ადამიანი, არავითარი კონტაქტი და ურთიერთობა არა მაქვს რუსეთის მოქალაქეებთან და არც მქონია არასდროს. არ მყავს მეგობრები და ნაცნობები რუსეთში და ამიტომ ძალიან უცნაურია, როდესაც საქართველოს პარლამენტთან მე მელოდება რუსეთის მოქალაქე რამდენიმე დღის განმავლობაში.

რამდენადაც ჩემთვის ცნობილია, ხაზგასმული იყო ჩემი უკრაინაში მოღვაწეობა, მან პოლიციას უთხრა, რომ მე ვიცი, ის უკრაინაში მუშაობდა. შეიძლება ამასთანაა კავშირში", - აღნიშნავდა ხატია დეკანოიძემ გადაცემა "360 გრადუსში" 14 ივნისს გაკეთებულ განცხადებაში.