საქართველოს პარლამენტის თავმჯდომარე შალვა პაპუაშვილი იუსტიციის უმაღლესი საბჭოს წევრობის კანდიდატებთან დაკავშირებით ოპოზიციას უმრავლესობასთან კონსულტაციის გამართვისა და ამით ევროკავშირის რეკომენდაციების შესრულებაში წვლილის შეტანისკენ მოუწოდებს.
საუბარია იუსტიციის უმაღლეს საბჭოში დარჩენილ ორ არამოსამართლე წევრის ვაკანსიაზე, სადაც კანდიდატებად წარდგენილი არიან: - რუსუდან კვინიკაძე, გოგა კიკილაშვილი, ლევან ნემსაძე და ნინო ნიშნიანიძე.
მათი არჩევის საკითხი პარლამენტის კენჭსაყრელ საკითხთა დღის წესრიგში ასახულია.
როგორც პაპუაშვილმა ბიუროს სხდომაზე განაცხადა, პარლამენტმა საგაზაფხულო სესიაზე საბჭოს სამი არამოსამართლე წევრი აირჩია, რაც ევროკომისიის მხრიდან დადებითად შეფასდა.
“ევროპულმა კომისიამ მოგვიწოდა დარჩენილი ორი ვაკანსიაც შევავსოთ. უკვე ნახევარი წელია, რაც ოთხი კანდიდატურა ჩვენს დღის წესრიგშია. არც ერთ ამ კანდიდატურაზე რაიმე ნეგატიური, ობიექტურად დასაბუთებული ან თუნდაც დაუსაბუთებელი მოსაზრება არ მომისმენია. ამიტომ გთხოვთ, რომ ამ მხრივ თქვენი წვლილი შეიტანოთ რეკომენდაციების შესრულებაში“, - მიმართა პარლამენტის თავმჯდომარემ ოპოზიციას.