ბექა ლილუაშვილი - ეს არ არის იმპიჩმენტი სალომე ზურაბიშვილის წინააღმდეგ, ეს არის ქვეყნის ევროპული მომავლის და კანდიდატის სტატუსის იმპიჩმენტი

ეს არ არის იმპიჩმენტი სალომე ზურაბიშვილის წინააღმდეგ, ეს არის ქვეყნის ევროპული მომავლის და კანდიდატის სტატუსის იმპიჩმენტი, - ამის შესახებ ჟურნალისტებთან პარტია „საქართველოსთვის" წევრმა ბექა ლილუაშვილმა განაცხადა.

მისი თქმით, ისე ოპერატიულად ჩაინიშნა პროცესი, რომ დასანქცირებულმა მოსამართლეებმა, დიდი ალბათობით, მიიღეს ინსტრუქტაჟი და მოლოდინი აქვს, რომ სასამართლო დაადგენს კონსტიტუციასთან შეუსაბამობას.

რაც შეეხება პარლამენტის როლს, ლილუაშვილი მიიჩნევს, რომ „ნაციონალური მოძრაობის" წევრების განცხადებები არათანმიმდევრულია და განცდა რჩება, რომ ეს საკითხი სერიოზული ვაჭრობის და შეთანხმებების საგანი იქნება.

„არანაირი მნიშვნელობა არ აქვს, დაარღვია ამ კონტექსტში პრეზიდენტმა კონსტიტუცია, ამაზე კონსტიტუციონალისტებმა იდავონ, ვინ უფრო არღვევს კონსტიტუციას: პრეზიდენტი, მთავრობის წარმომადგენლები თუ პარლამენტის თავმჯდომარე, როცა მაგალითად, საგამოძიებო კომისიას არ ქმნის, ამის დროც იქნება და საშუალებაც, მაგრამ ამ მოცემულობაში „ოცნების“ მიერ გადადგმული ეს ნაბიჯი, არის ღია, პირდაპირი დაპირისპირება და შეტევა პრეზიდენტის ინსტიტუტზე. სანამ კანდიდატის სტატუსზე გადაწყვეტილება იქნება მიღებული, აბსოლუტურად არანაირი მნიშვნელობა არ აქვს ამას [დაარღვია თუ არა კონსტიტუცია], ეს არ არის იმპიჩმენტი სალომე ზურაბიშვილის წინააღმდეგ, არანაირი მნიშვნელობა არ აქვს სალომე იქნება თუ სხვა, ეს არის იმპიჩმენტი ქვეყნის ევროპული მომავლის, კანდიდატის სტატუსის იმპიჩმენტი”, - განაცხადა ლილუაშვილმა.

ინფორმაციისთვის, საკონსტიტუციო სასამართლო პრეზიდენტ სალომე ზურაბიშვილის იმპიჩმენტის თაობაზე კონსტიტუციურ წარდგინებას ზეპირი მოსმენით დღეს, 3 ოქტომბერს განიხილავს.

ალექსანდრე თვალჭრელიძე - ძალიან მინდა დავიჯერო, რომ ჩინური კომპანიის შერჩევა პროექტის განსახორციელებლად უბრალოდ გაუაზრებელი ნაბიჯია და არა პოლიტიკური ტრენდის შეცვლის შემაშფოთებელი ნიშანი
Webster University Georgia-ს რექტორი ჟან პოლ ვან მარისინგი - უნივერსიტეტს აქვს პოტენციალი, რეგიონის საგანმანათლებლო ჰაბი გახდეს
ქართული პრესის მიმოხილვა 24.06.2024
„საქკაბელმა“ ბრონირებული NAYBY კაბელის წარმოება დაიწყო
4 რჩევა სამსუნგის ინჟინრებისგან თუ როგორ გამოიყენო Windfree კონდიციონერი ყველაზე ეფექტურად