მაია კოპალეიშვილი ირაკლი კობახიძეს - წესიერად ილაპარაკეთ - თქვენ მიხედეთ თქვენ წარსულს, გავრილოვი თქვენ ჩამოიყვანეთ, მე არ ჩამომიყვანია

თქვენი პოზიციით, საქართველოს პრეზიდენტის, სალომე ზურაბიშვილის მიერ გერმანიაში, საფრანგეთსა და ბრიუსელში განხორციელებული ვიზიტები იყო სამუშაო თუ კერძო ვიზიტები?, - ამ კითხვით მიმართა „ქართული ოცნების“ თავმჯდომარემ, ირაკლი კობახიძემ საკონსტიტუციო სასამართლოში საქართველოს პრეზიდენტის, სალომე ზურაბიშვილის წარმომადგენლებს.

ამ კითხვაზე, კობახიძეს პრეზიდენტის წარმომადგენელმა თამარ ჩუგოშვილმა უპასუხა და აღნიშნა, რომ სალომე ზურაბიშვილის მიერ ევროპის სამ ქვეყანაში გამართულ ვიზიტებში ზურაბიშვილი წარმოდგენილი იყო, როგორც საქართველოს პრეზიდენტის სტატუსით.

„კერძო ვიზიტში თუ გულისხმობთ, რომ სალომე ზურაბიშვილი იქ იყო წარმოდგენილი, როგორც საქართველოს პრეზიდენტის თუ სხვა სტატუსით, რა თქმა უნდა წარმოდგენილი იყო, როგორც საქართველოს პრეზიდენტი. სამუშაო ვიზიტს დაარქმევთ, ვიზიტს, თუ სამუშაო შეხვედრას ამას მნიშვნელობა არ აქვს. პრეზიდენტს ჰქონდა შეხვედრა“, - უპასუხა ჩუგოშვილმა, რაზეც კობახიძემ აღნიშნა, რომ სამუშაო ვიზიტისა და ოფიციალური ვიზიტის დიფერენცირებას ახდენს კანონი, რაც პრეზიდენტმა და მისმა ადმინისტრაციამ უნდა იცოდეს.

„თქვენ უნდა გქონდეთ პასუხი, რა არის სამუშაო ვიზიტი და ოფიციალური ვიზიტი. კანონში წერია, რომ კერძო ვიზიტი არის ნებისმიერი ისეთი ვიზიტი, რომელიც კერძო მიზნებით ხორციელდება. მაგალითად, პრეზიდენტი პარიზში შეიძლება წავიდეს საკუთარი შვილის მოსანახულებლად, მაგრამ ის თუ, რა არის სამუშაო ვიზიტი და ოფიციალური ვიზიტი, დიფერენცირებას ახდენს კანონი, რაც პრეზიდენტმა და მისმა ადმინისტრაციამ უნდა იცოდეს. დარწმუნებული ვარ, რომ ძალიან კარგად იციან. პრეზიდენტის ადმინისტრაციაში კომპეტენტური ადამიანები მუშაობენ“, - აღნიშნა კობახიძემ.

ირაკლი კობახიძის კითხვას საქართველოს პრეზიდენტის წარმომადგენელმა, მაია კოპალეიშვილმაც გასცა პასუხი და აღნიშნა, რომ ევროპაში განხორციელებული ვიზიტი "იყო კერძო ვიზიტი, რომელსაც საქართველოს პრეზიდენტი ასრულებდა თავისი უფლებამოსილების ფარგლებში“.

ამის შემდეგ კი ირაკლი კობახიძემ პრეზიდენტის ადმინისტრაციის მიერ 2023 წლის, 12 ივლისს, მთავრობის ადმინისტრაციისთვის გაგზავნილი მიმართვის ციტირება გააკეთა.

„საქართველოს მთავრობის მიმართ არის გაგზავნილი პრეზიდენტის მიმართვა, ნომერი 5041. (ეს მიმართვა ეხება გერმანიაში ვიზიტს). საუბარია იმაზე, რომ პრეზიდენტს სურს, ბერლინში სამუშაო ვიზიტის განხორციელება. პირდაპირ ეს წერია. საბოლოო ჯამში, პრეზიდენტმა სამუშაო ვიზიტი განახორციელა, ანუ რაც ჰქონდა დაგეგმილი, ის განახორციელა“,- აღნიშნა კობახიძემ, რაზეც პრეზიდენტის წარმომადგენლის, კოპალეიშვილის მხრიდან განმარტება მოჰყვა , რომ „როგორც იწერება პრეზიდენტი ისე იყო. ეს არ იყო პირადი და კერძო ვიზიტი, ეს იყო სამუშაო ვიზიტი“.

პრეზიდენტის წარმომადგენლის აღნიშნული პოზიციას პასუხად კობახიძემ განაცხადა, რომ პრეზიდენტი პოზიციებს "ცვლის ხოლმე".

„არა, ამ პოზიციას ცვლის ხოლმე. 1 თვის წინ სხვა რამეს ფიქრობდა და 1 თვის თავზე სხვანაირად ფიქრობს, ამიტომ საინტერესოა დღეს რას ფიქრობს პრეზიდენტი: სამუშაო ვიზიტი იყო თუ კერძო ვიზიტი. პრეზიდენტი ხომ არ ფიქრობს რომ მან სამუშაო ვიზიტი გარდაქმნა კერძო ვიზიტად?“, - აღნიშნა კობახიძემ.

„ქართული ოცნების“ თავმჯდომარემ საკონსტიტუციო სასამართლოში, პრეზიდენტის წარმომადგენლებს კიდევ ერთი კითხვით მიმართა:

„თქვენ აღნიშნეთ, რომ ჩვენ არასწორად მოვახდინეთ პრეზიდენტის კონკრეტული სიტყვების ციტირება. ლიეტუვურ ენაზეც გადავამოწმეთ, თუ რა თქვა სალომე ზურაბიშვილმა და მან თქვა შემდეგი რამ - „ძალიან ვწუხვარ, რომ ფორმალურად არ ვარ უფლებამოსილი ეს გავაკეთო“, ადასტურებთ თუ არა ამ ციტატის სისწორეს?

კობახიძის ამ კითხვაზე მაია კოპალეიშვილმა მოითხოვა, რომ მოიხსნას ისეთი კითხვები, რომელიც კავშირში არ არის წარდგინებასთან.

რაზეც კობახიძემ რეპლიკით უპასუხა: „მგონია რომ კარგ კითხვებს ვსვამ“.

ირაკლი კობახიძემ მისი კითხვის შინაარსი განმარტა და აღნიშნა, რომ პრეზიდენტი სხვა რამეს ამბობს და მისი წარმომადგენლები კი სხვას.

„განვმარტავ თუ რატომ ვსვამ ამ კითხვას. ლიეტუვურ ენაზეც არის ნათარგმნი, ინგლისურ ენაზეც არის... რეალურად პრეზიდენტი სხვა რამეს ამბობს და მისი წარმომადგენლები სხვა რამეს. ამიტომ იყო მნიშვნელოვანი, რომ პრეზიდენტი ყოფილიყო აქ“,- აღნიშნა კობახიძემ.

ამას სხდომათა დარბაზში ხმაური მოჰყვა. საქართველოს პრეზიდენტის წარმომადგენელმა, მაია კოპალეიშვილმა კობახიძეს ასე მიმართა - „არასწორია, რასაც აკეთებთ“.

რაზეც კობახიძემ უპასუხა, რომ ადეიშვილის სასამართლო კი არ არის. არამედ საკონსტიტუციო სასამართლოა და მას სასამართლოს პატივისცემისკენ მოუწოდა.

„წესიერად ილაპარაკეთ, თორემ მეც გეტყვით ვის სასამართლოში ხართ“, - უპასუხა კოპალეიშვილმა.

ამაზე კობახიძემ ასე უპასუხა: - „ადეიშვილის სასამართლო არ არის და არც გვარამიას, ვისი მოადგილეც იყავით წლების მანძილზე!“.

„მერე რა მე ვამაყობ ამით“, - უპასუხა მაია კოპალეიშვილმა და კობახიძის მისამართით დასძინა: „თქვენ მიხედეთ თქვენ წარსულს, გავრილოვი თქვენ ჩამოიყვანეთ, მე არ ჩამომიყვანია“.

ალექსანდრე თვალჭრელიძე - ძალიან მინდა დავიჯერო, რომ ჩინური კომპანიის შერჩევა პროექტის განსახორციელებლად უბრალოდ გაუაზრებელი ნაბიჯია და არა პოლიტიკური ტრენდის შეცვლის შემაშფოთებელი ნიშანი
Webster University Georgia-ს რექტორი ჟან პოლ ვან მარისინგი - უნივერსიტეტს აქვს პოტენციალი, რეგიონის საგანმანათლებლო ჰაბი გახდეს
ქართული პრესის მიმოხილვა 24.06.2024
„საქკაბელმა“ ბრონირებული NAYBY კაბელის წარმოება დაიწყო
4 რჩევა სამსუნგის ინჟინრებისგან თუ როგორ გამოიყენო Windfree კონდიციონერი ყველაზე ეფექტურად