პარლამენტის თავმჯდომარის, შალვა პაპუაშვილის განმარტებით, პრეზიდენტის იმპიჩმენტის საკითხზე „ნაციონალურ მოძრაობასთან“ არანაირი მოლაპარაკებები არ მიმდინარეობს.

როგორც მან ჟურნალისტებს განუცხადა, „ოპოზიცია იმდენად არის თავის ფობიებში და შიშებში ჩაკეტილი, რომ რაღაც კონსპირაციების თეორიების შექმნას ცდილობს“.

„ეს საკითხი აჩვენებს მხოლოდ ოპოზიციის ფობიებს და შიშებს, რამდენად არ არიან ისინი დარწმუნებული საკუთარ თავში. შესაბამისად, რას სთხოვენ ისინი ამის შემდეგ მოქალაქეებს, რომ მათ ანდონ მანდატი ჯგუფს, რომელსაც იმდენი ნდობაც კი არ აქვს საკუთარი თავის საკუთარი ხელების მიმართ, რომ ფიქრობენ, დარბაზში საერთოდ არ შევიდნენ, რომ ხელი არ წასცდეთ და არ მიაჭირონ ღილაკს თითი. ეს მხოლოდ ერთადერთი რამის დასტურია, ოპოზიცია იმდენად არის თავის ფობიებში და შიშებში ჩაკეტილი, რომ რაღაც კონსპირაციების თეორიების შექმნას ცდილობს. არანაირი მოელაპარაკები და ასე შემდეგ არ მიმდინარეობს. ჩვენ თავიდანვე ვთქვით, როდესაც იმპიჩმენტის პროცესი დავიწყეთ, ჩვენ ამოვდივარ იქიდან, რომ პარლამენტში მას არ ეყოლება უმრავლესობა და ეს არც არის გადამწყვეტი. საერთო ჯამში, მოქმედ პრეზიდენტს დარჩა 1 წელი და ეს არ არის გადამწყვეტი საკითხი ამ მხრივ. გადამწყვეტი არის სასამართლოს გადაწყვეტილება, ვინაიდან ის იქნება ოფიციალური განაჩენი, რომელსაც საქართველოს პრეზიდენტი ვერსად გაექცევა. იმედია, ის სასამართლოს გადაწყვეტილების დარღვევაზე აღარ წავა“, - განაცხადა პაპუაშვილმა.