ოზურგეთის მე-4 საჯარო სკოლასთან საპროტესტო აქცია მიმდინარეობს

„დარჩეს ბატონი ტარიელი“, „მოგვეცით არჩევანის უფლებ“, „ძირს უსამართლობა“, - ამ შინაარსის ტრანსპარანტებით ოზურგეთის მე-4 საჯარო სკოლასთან საპროტესტო აქცია მიმდინარეობს. სკოლის მასწავლებლები, მოსწავლეები და მშობლები დირექტორის არჩევნებიდან ტარიელ კალანდაძის კანდიდატურის მოხსნას აპროტესტებენ. მათი განცხადებით, გაუგებარია, თუ რატომ არ მიეცა მას აღნიშნულ არჩევნებში მონაწილეობის მიღების უფლება. მათი თქმით, სამეურვეო საბჭოს მხოლოდ ერთი კანდიდატი, იმავე სკოლის ქართული ენისა და ლიტერატურის პედაგოგი ხათუნა ლომთაძე წარედგინა, რომელიც საარჩევნო კომისიის თავმჯდომარე იყო.

„ბატონმა ტარიელმა დააკავშირა პედაგოგი პედაგოგს, სკოლა სკოლას დაამსგავსა და მძიმე წუთებში გვერდში გვედგა. ის არის ჩვენი ღირსეული საყრდენი. მის გარეშე ჩვენი აქ ყოფნა წარმოუდგენელია. რატომ ჩამოაშორეს დირექტორის თანამდებობას არ ვიცი, მაგრამ ძალიან დიდი უსამართლობაა. ჩვენი სკოლა აპოლიტიკურია და ჩვენი დირექტორი არასოდეს პარტიის წევრი არ ყოფილა", - განაცხადა მე-4 საჯარო სკოლის მასწავლებელმა მზია ურუშაძემ.