ბსუ-ში საერთაშორისო სტუდენტების მიღების დღე გაიმართა
ბათუმის სახელმწიფო უნივერსიტეტში, სტრატეგიული განვითარებისა და საგარეო ურთიერთობათა დეპარტამენტის ინიციატივით საერთაშორისო სტუდენტების მიღების დღე (Welcome Party) ჩატარდა. ინფორმაციას ბათუმის სახელმწიფო უნივერსიტეტი ავრცელებს.
მათივე ცნობით, მიმდინარე სემესტრში ბსუ-ს სხვადასხვა ფაკულტეტზე, ,,ერაზმუს+“-ის გაცვლითი პროგრამებისა და თანამშრომლობის მემორანდუმების საფუძველზე, საფრანგეთიდან, პოლონეთიდან, თურქმენეთიდან, ყაზახეთიდან და უკრაინიდან 14 სტუდენტი აგრძელებს სწავლას.
„უცხოელ სტუდენტებს უნივერსიტეტის რექტორის მოადგილე, თამარ სირაძე, ხარისხის უზრუნველყოფის სამსახურის უფროსი, ვლადიმერ ღლონტი, სტრატეგიული განვითარებისა და საგარეო ურთიერთობათა დეპარტამენტის უფროსი, მარინე გიორგაძე და ამავე დეპარტამენტის წარმომადგენლები მიესალმნენ. სტუდენტთა კარიერული განვითარების, კულტურისა და სპორტის დეპარტამენტის სამსახურმა სტუდენტებს ბსუ-ში მოქმედი კლუბები, სპორტული სექციები გააცნო და ისინი მონაწილეობისთვის მიიწვია. შეხვედრა მუსიკალურად ბსუ-ს ბენდმა გააფორმა.
უცხოელმა სტუდენტებმა თავიანთი ქვეყნებისა და უნივერსიტეტების შესახებ საინტერესო და სახალისო პრეზენტაციები წარმოადგინეს, ასევე, ეროვნული სუვენირებითა და კერძებით გაფორმებული კუთხეები.
შეხვედრაზე სამომავლო აქტივობებიც დაიგეგმა, რაც უცხოელ სტუდენტთა კულტურულ ინტეგრაციას ხელს შეუწყობს“, - აღნიშნულია ინფორმაციაში.
v-if="article.gallery" v-html="article.gallery"
