ამერიკელი სენატორი, ბერნი სანდერსი ისრაელისთვის 10 მილიარდი დოლარის ოდენობის სამხედრო დახმარების პაკეტის გაგზავნას ეწინააღმდეგება, - ამის შესახებ ინფორმაციას The Hill-ი ავრცელებს.

„არ ვფიქრობ, რომ მემარჯვენე, ექსტრემისტი ნეთანიაჰუს მთავრობისთვის ჩვენ 10,1 მილიარდი დოლარი უნდა გამოვყოთ, რათა მან ამჟამინდელი სამხედრო მიდგომა განაგრძოს. ის, რასაც ნეთანიაჰუს მთავრობა აკეთებს, არის ამორალური, არღვევს საერთაშორისო სამართალს და ამერიკის შეერთებული შტატები ამ ქმედებების თანამონაწილე არ უნდა იყოს“, - განაცხადა სანდერსმა სენატის სხდომაზე.

ისრაელისთვის 10 მილიარდი დოლარის ოდენობის სამხედრო დახმარების გადაცემა პრეზიდენტ ბაიდენის ადმინისტრაციამ მოითხოვა და დახმარების მიზანს ისრაელის „რკინის გუმბათისა“ და „დავითის შურდულის“ საჰაერო თავდაცვის სისტემის აღდგენა, ასევე სამხედრო მარაგების შევსება წარმოადგენს.